Sekretáriu Jerál ONU, António Guterres

DILI, 21 juñu 2021 (TATOLI)—Reprezentante povu sira iha uma fukun Parlamentu Nasionál, segunda ne’e aprova votu kongratulasaun ba rekonduzaun António Guterres ne’ebé kontinua lidera kargu Sekretáriu Jerál Organizasaun Nasaun Unida (ONU) ba tinan-lima.

Votu kongratulasaun ne’e aprovadu liuhosi plenária ho rezultadu votasaun a-favór 49, kontra 0 no abstensaun 0.

“Nune’e votu kongratulasaun ba rekonduzaun António Guterres aprovadu,” Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputadu Luis Roberto da Silva, anunsia liuhosi plenária.

Xefe Bankada FRETILIN, Deputadu Francisco Miranda Branco, konsidera António Guteres nu’udar figura importante iha prosesu Timor-oan sira-nia luta iha prosesu luta ba libertasaun nasionál.

“Nia nu’udar figura ne’ebé dezempeña nia funsaun hanesan Sekretáriu Jerál ne’ebé destaka nia iha polítika ho kompromisu ba kombate alterasaun klimátika ne’ebé mundu tomak oras ne’e daudaun hasoru. Nia mós iha polítika defende direitu umanu no iha polítika atu iha prosesu dezenvolvimentu mundu nian,” Xefe Bankada FRETILIN ne’e hateten.

Bankada FRETILIN mós apresia ho António Guterres ne’ebé iha mandatu dahuluk hasoru teste boot kona-ba problema pandemia globál COVID-19.

Entretantu Xefe Bankada CNRT, Deputadu Duarte Nunes, espera António Guterres hetan susesu hosi rekonduzaun ba kargu Sekretáriu Organizasaun Nasaun Unida (ONU) nian.

“Ne’e onra ida ba ita hotu. Ita hotu hatene katak iha nia tempu mak ita hetan vitória ba ita-nia fronteira marítima. Tanba ne’e, ita hotu espera nia bele hetan susesu boot iha mandatu daruak ne’e,” Xefe Bankada CNRT ne’e felisita.

Xefe Bankada Partidu Demokrátiku (PD), Deputadu António da Conceição “Kalohan”, hateten votu kongratulasaun ne’e merese ba António Guterres.

“Ne’e orgullu ba ita hotu tanba nia líder hosi nasaun sira iha CPLP nian. Iha nia tempu mós ita hahú referendu ba Timor-Leste bainhira nia sei asume kargu nu’udar primeiru-ministru. Iha nia tempu mak ita hetan vitória ba fronteira marítima,” Xefe Bankada PD ne’e kongratula.

Parlamentu Nasionál aprova votu kongratulasaun ne’e hafoin iha loron 18 juñu 2021, António Guterres rekonduzidu iha kargu Sekretáriu Jerál ONU no toma mandatu daruak ba tinan lima tán. Mandatu daruak ne’e sei inísia iha loron 1 janeiru 2022.

Proposta votu kongratulasaun ne’e inísia hosi Deputadu Francisco Miranda Branco, Abel Pires da Silva, Duarte Nunes no deputada Olinda Guterres.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here