MSSI no UNICEF lansa plataforma online Covid-19 ba protesaun labarik. Iha Salaun UN Kaikoli, Segunda (06/21). Imajen Tatoli/Francisco Sony.

DILI, 21 juñu (TATOLI)—Governu liuhosi Ministériu Solidaridade Sosiál no Inkluzaun (MSSI) ho United Nations Children Fund (UNICEF), segunda ne’e lansa plataforma online COVID-19 ba protesaun labarik hodi haforsa no hametin liután kapasidade atu responde ba situasaun emerjénsia nia-laran.

Diretór Jerál Ministériu Solidaridade Sosiál no Inkluzaun, Rui Manuel Gago Exposto, hateten plataforma online ne’e nu’udar rekursu armajen koñesimentu oioin ne’ebé mak sei ajuda ofisiál (servisu na’in) ba protesaun labarik no pontu fogál sira bazea ba jéneru liu-liu oinsá atu fó asisténsia ba protesaun labarik ihaTimor-Leste.

“Liuhosi plataforma online COVID-19 ne’e nu’udar armajen ba rekursu koñesementu oioin. Ohin, ita mai hamutuk hodi lansa plataforma online COVID-19 ba protesaun labarik ne’ebé dezenvolve iha 2020 nia rohan, haforsa no hametin liután kapasidade atu responde ba situasaun emerjénsia nia-laran,” Rui Manuel Gago Exposto hateten liuhosi diskursu iha serimónia lansamentu Plataforma Online COVID-19 Ba Protesaun Labarik, iha salaun Kofi Anan Kampaun Nasaun Unida (UN), Caicoli, Dili, segunda ne’e.

MSSI iha opurtunidade hodi louva no kontinua halo kooperasaun ho UNICEF, nune’e konitnua hametin sistema bens estar ba labarik no família labarik sira hotu iha Timor-Leste.

Governu iha planu asaun nasionál entre MSSI ho UNICEF ba tinan 2021-2022, maibé tinan ida-ne’e UNICEF sei dezenvolve sistema jestaun protesaun labarik ba baze dadus nian, no ho ida-ne’e hein bele rezolve dezafiu ne’ebé Timor-Leste hasoru relasiona ho dadus.

Komisaria Komisaun Nasionál Diretu Labarik, Dinorah Granaderio. Imajen Tatoli/Francisco Sony.

Iha fatin hanesan Komisária Komisaun Nasionál Direitu Labarik (KNDL), Dinorah Granadeiro, hateten plataforma online ne’e dahuluk iha Timor-Leste ne’ebé foku liu ba rekolla materiál liga ho situasaun COVID-19, entaun liuhosi plataforma ne’e bele hafasil servisu sosiál no inan-aman inklui instituisaun ne’ebé presiza matéria, no matéria ne’e bele apoiu ba direitu labarik sira-nian.

“Ami hein katak asisténsia hirak ne’e sei kontinua. Governu Timor-Leste garante duni labarik sira-nia direitu iha Timor-Leste tuir Konstituisaun ne’ebé iha,” nia dehan.

Plataforma online ne’e ninia desvantanjén mak iha situasaun COVID-19 ladún fó espasu hodi hasoru direta atu movimenta ba-mai no mós matéria hirak ne’ebé iha plataforma online ida-ne’e, bele apoiu tebes servisu sosiál sira bainhira sira presiza materiál ruma ne’ebé mak atu apoiu ba sira-nia servisu no inan-aman inklui ho instituisaun ne’ebé liga ho direitu labarik.

Programa ne’e ninia vantajen mak presiza iha nia konesaun internete ne’ebé mak di’ak tanba Timor-Leste liña ne’ebé mak susar tebes ho internete. Maibé, hein katak ho lansamentu ida-ne’e MSSI ho UNICEF bele kontinua fó asisténsia ba servisu sisiál sira atubele asegura duni katak informasaun hirak ne’e bele apoiu iha sira-nia servisu loron-loron nian.

Komisária ne’e hato’o agradese ba MSSI ho UNICEF ne’ebé iha inisiativa hodi hamosu plataforma online COVID-19 ba protesaun labarik, hodi asegura no hametin di’ak liután kapasidade responde situasaun emerjénsia.

Entretantu Vise Reprezentante UNICEF iha Timor-Leste, Scott Whollery, hateten nia parte sente kntente ba lansamentu plataforma online ida-ne’e tanba sei ajuda no haforsa tan kapasidade responde emerjénsia maibé la’ós de’it ba responde emerjénsia maibé atendementu servisu ba protesaun labarik nian

Vise Reprezentante UNICEF Iha Timor-Leste, Scoot Whoolery. Imajen Tatoli/Francisco Sony.

Iha situasaun emerjénsia nesesidade protesaun labarik nian aumenta tebes entaun presiza liután hametin sistema protesaun labarik, nune’e forsa liután hodi responde ba nesesidade hirak ne’e entaun plataforma ida-ne’e hanesan instrumentu ida hodi haforsa liután kapasidade aumenta liután ba iha emerjénsia nian, kapasidade koordenasaun atu bele responde nesesidade hotu.

“Ita hatene katak emerjénsia hatodan risku ba labarik sira no sistema ne’ebé mak iha atu suporta sira entaun liuhosi plataforma ne’e sai hanesan instrumentu ida hodi hametin sistema. Maibé iha kulker situasuan iha labarik ida hasoru violénsia. Abuzu ne’e kategória ba emerjénsia entaun plataforma bele haree ba situasaun ida-ne’e,” nia klarifika.

Programa plataforma online COVID-19 ba protesaun labarik suporta hosi DIVAT ho montante orsamentu rihun $300, no hosi rihun $300 ne’e rihun $10 mak suporta ba plataforma online ne’e no restu ba programa sira seluk.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here