Membru F-FDTL Komponente Terrestre simu vasina AstraZeneca doze daruak, iha Lanud Baucau, segunda (21/06). Imajen TATOLI/Natalino Belo

BAUCAU, 21 juñu 2021 (TATOLI)Membru FALINTIL-Forsa Defeza Timor-Leste (F-FDTL) Komponente Terrestre Baucau hahú partisipa kampaña vasinasaun AstraZeneca doze daruak ba prevensaun COVID-19, hodi kumpre misaun serbisu defeza.

Xefe Operasaun Komponente Terrestre F-FDTL, Kapitaun Helio Filipe Dias Quintas, hateten, maioria membru simu ona vasina doze dahuluk no daruak.

Xefe Operasaun Komponente Terrestre, Kapitaun Helio Filipe Dias Quintas. Imajen TATOLI/Natalino Belo

“Tanba Militar hanesan liña frente, entaun ami tenki simu tamba ami komponente terrestre mós serbisu iha fronteira barak liu no ao mesmo tempo iha mos postu rua, ida iha Laiwai no Vemasse, entaun obrigatóriu sira tenki simu,” Xefe Operasaun hateten iha Lanud, Baucau segunda ne’e.

Notísia relevante: Lansa vasina doze daruak, PAM Baucau enkoraja hatutan informasaun

Tuir Quintas, Komponente Terrestre baibain hala’o serbisu rotasaun, entaun membru balun simu doze dahuluk iha fronteira Maliana no Suai, balun iha Komponente Terrestre Baucau, nune’e daudaun ne’e membru balun kompleta doze daruak iha Baucau no balun iha fronteira inklui postu.

“Ami liña frente hafoin simu serbisu tenki ba, tanba ne’e ami tenki iha imunidade forte liután, entaun ami ba halo misaun la sente problema ruma kona-ba família ruma no ami sente katak seguru liu ona ba ami-nia an,” nia argumenta.

Antes ne’e, durante simu vasina doze dahuluk, membru balun mak hetan efeitu hanesan isin manas, maibé maioria laiha efeitu tamba ezersísiu beibeik nune’e fízikamente forte.

Membru F-FDTL Komponente Terrestre simu vasina AstraZeneca doze daruak, iha Lanud Baucau, segunda (21/06). Imajen TATOLI/Natalino Belo

“Membru sira ne’ebé simu ona doze daruak atinje 90%,” nia hatutan.

Aleinde membru Komponente Terrestre, vasinasaun ne’e mos envolve sidadaun sira ne’ebé nu’udar koziñeira no cleaner, inklui família hosi membru komponente terrestre rasik.

Komponente Terrestre iha membru 493, ne’ebé maka destakadu hamutuk 114 iha fronteira Bobonaro-Maliana, membru 114 iha Covalima-suai, no postu Vemasse na’in-10 inklui Laiwai na’in-10.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here