Natar iha Atabae. Imajen TATOLI/António Gonçalves

DILI, 21 juñu 2021 (TATOLI)–Diretora Jerál Ministériu Agrikultura no Peska (MAP), Odete  Maria do Ceu Guterres, informa, Ministériu tinan ne’e rejista área kultivasaun hare sa’e.

“Hosi área poténsia agríkola daudaun ne’e ektare 80.568, iha aumentu área kultivasaun 24.540, tanba ne’e ami-nia projesaun hare tinan ne’e ektare 97.660, se ita halo ekivalénsia ba foos iha tonelada 58.000 ka kuaze 60.000, maski iha situasaun inundasaun ne’ebé akontese foin lalais, maibé área kultivu ne’e aumenta,” Diretora informa ba Agência TATOLI, iha ninia knaar fatin, MAP Comoro, segunda ne’e.

MAP no komunidade halo kolleta hare iha Webaba iha rai ektare 763, hosi rai poténsia ektare 2.073.

“Maibé tinan ne’e sei aumenta tan ektare 1.640. Ne’e indikadór di’ak tebes,” nia akresenta.

Diretora ne’e haktuir, munisípiu Bobonaro iha poténsia rai ektare 700 resin, maibé tinan ne’e sa’e ba ektare 4.743.

Enkuantu, iha munisípiu Baucau, baibain iha de’it área seisal ninian, ne’ebé tinan barak nia laran labele halo natar, maibé tinan ne’e área kultiva sa’e to’o ektare 1.000 resin.

“Entaun hosi indikasaun sira-ne’e, maski inundasaun ataka iha fatin balun, maibé produsaun hare sa’e iha parte balun. Tanba ne’e, produsaun haree tinan ne’e sei sa’e ba 60.000,” nia tenik.

Tuir polítika MAP, atu hasa’e nafatin produtividade no produsaun rai-laran.

“Área kultiva ne’e aumenta tanba ita-nia agrikultór hetan motivasaun, entaun atu enkoraja sira maka ita fó asisténsia téknika no sei fó nafatin liuhosi ita-nia estensionista sira, mantein polítika fó mina ba ema ne’ebé badinas, tanba fó mina ne’e mós gratuita,” nia hatutan.

Diretora dehan, polítika fó mina hosi MAP presiza identifika sé maka iha responsablidade mak bele simu atu halai natar.

“Ita nafatin fó pestisida, fini no adubu ba agrikutór sira, nune’e sira iha motivasaun katak sei hetan asisténsia hosi Governu,” Odete Maria subliña.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here