Reitor Institutu Profissional de Canossa (IPDC) Madre Ervinia Brito. Imajen/TATOLI

DILI21 juñu 2021 (TATOLI)—Reitora Institutu Profisionál de Canossa (IPDC), Madre Ervinia Martins Brito, informa Governu Xina liuhosi iha Embaixadór iha Timor-Leste, Xiao Jianguo, apoiu livru lian mandarin ba Institutu Profisionál de Canossa atu suporta biblioteka.

Notísia Relevante: IPDC Entrega Sertifikadu Ba Estudante Kursu Lian Mandarin

“Embaixada Xina suporta ami livru ho lian xina ka mandarin ni’an, no livru sira fó ne’e atu suporta ami-nia biblioteka ba kursu lian mandarian. Embaixadór ne’e sente hakfodak ho inisiativa IPDC loke kursu ho lian mandarin ne’e,” Madre Ervinia Martins Brito hateten ba Agência Tatoli iha nia knaar fatin, Canossa Manleuana, Díli, ohin.

Governu Xina fó apoiu IPDC iha tinan 2020, ho livru hamutuk kaixa tolu mak hanesan livru livru gramátiku, materia didatikas, no livru história oinsá atu aprende kultura xina nian.

Objetivu loke kursu lian mandarin ne’e tanbá haree joven barak iha interese atu ba eskola iha Xina, entaun IPDC iha hanoin ida oinsá atu prepara joven sira ho kursu báziku lian mandarin ba formandu sira atu hatene.

IPDC loke formasaun ne’e hakarak fó mós treinamentu ba ema sira ne’ebé serbisu iha imigrasaun nian tanbá hatene katak Timoe-Leste ne’e nakloke ba ema estranjeiru barak, aleinde sira bele atende xina sira-ne’ebé mai maske ho komunikasaun báziku hodi bele iha atendimentu di’akliu iha servisu fatin.

Formasaun ba lian Mandarin ne’e hahú iha tinan 2019, ne’ebé loke ba públiku atu rejistu hodi bele tuir formasaun ho lian mandarin ba fulan tolu, no formandu dahuluk ne’ebé rejistu ne’e hamuutuk na’in-17.

“Hosi total na’in-17 ne’e, formandu na’in-13 mak konsege finaliza kursu no hetan diploma iha tinan 2020. Entre sira na’in-13 ne’e, iha na’in-rua mak selesionadu ona hosi embaixada Xina ninian, ne’ebé sei hetan apoia ba eskola iha rai liur hanesan bolseiru,” Madre Erminia hateten.

Enkuantu iha tinan 2021 ne’e, IPDC loke tan kursu ho lian Inglés no komputadár básiku. Kursu lian inglés kuaze estudante 50-resin ne’ebé halo ona inskrisaun no sira tuir ona kursu dala tolu no kursu komputadór báziku nian labarik na’in-15 mak tuir ona kursu ne’e, maibé tanbá pandemia COVID-19 halo kursu ne’e paradu tiha.

“Instituisaun iha mehi ba oin atu loke tan kursu lian portugês ho matéria exata sira hanesan, Kimika no Fisika ba estudante sira. No kursu ne’e, ami fó prioridade ba Ensinu Báziku Canossa nian no karik Ensinu Sekundáriu iha interese, ami iha planu ba future. Kuandu kursu ne’e la’o ba oin no jere ho di’ak ona, iha hanoin atu loke kursu ne’e ba públiku,” nia dehan.

Nia informa, iha tinan 2021 ne’e formandu hamutuk na’in-72 mak tuir ona kursu iha IPDC iha área sira hanesan lian Mandarin ema na’in-hitu (7), Inglés ema na’in-50 no komputadór ema na’in-15.

“Ho situasaun COVID-19, ami suspende tiha atividade ne’e. Ne’ebé, ami hein, karik Ministériu Edukasaun, Juventude no Desportu (MEJD) foti desizaun atu reativa fali ensinu aprendizajen mak ami mós komesa fila-fali kursu ne’e,” hateten.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here