Estatu Proklamador Republika Demokratiku Timor Leste,Francisco Xavier do Amaral hafoin inagura husi Presidenti da Republika Francisco Guterrs iha rotunda eis merkadu lamam, Dili 20 de Maiu 2017

DILI, 21 juñu 2021 (TATOLI)—Xefe Bankada Frente Revolucionária de Timor-Leste Independente (FRETILIN), Deputadu Francisco Miranda Branco, husu Governu halo observasaun ba kondisaun estátua proklamadór Francisco Xavier do Amaral ne’ebé lokaliza besik iha rotunda Sentru Konvensaun Dili (CCD-sigla portugés). 

Notísia Relevante: “Ha’u-nia Prezidente iha Ai-laran”

“Joven lubuk ida preokupa loos ho ita-nia proklamadór Francisco Xavier do Amaral nia estátua ne’e, iha rotunda Sentru Konvensaun Dili (CCD-sigla portugés). Uluk nia kór ne’e abu-abu metan, agora sai malahok (buradu) tiha. Joven sira husu nusá mak ita-nia figura importante ida, proklamadór ba independénsia, nia estátua ne’e sai buradu tiha. Ha’u husu ho respeitu tomak VIII Governu Konstitusionál atu intervein hodi tau fila-fali dignidade no onra ba ita-nia proklamadór ne’e,” Xefe Bankada FRETIILIN ne’e levanta liuhosi plenária, segunda ne’e.

Nia haktuir, estátua ne’e inaugra iha loron 20 maiu 2017 maibé to’o ohin loron nia kór ne’e sai malahok tiha tanba ne’e presiza atensaun hosi Governu.

“Ha’u ba verifika loos duni. Ita la koñese tiha estátua ne’e. Hanesan, ita halimar fali ho ita-nia figura importante nasaun ninian. Ita la dignifika. Ita la fó onra ba ita-nia proklamadór repúblika. Karik tanba kualidade materiál ladi’ak. Karik seriedade polítika atu halo estátua ne’e mak laiha. Karik laiha estudu ida di’ak. Karik laiha planeamentu ida di’ak mak nia rezultadu sai tiha buradu hanesan ne’e,” nia kestiona.

Xefe Bankada FRETILIN ne’e husu ba Governu haree situasaun ne’e hodi halo pintura di’ak fila-fali, labele husik estátua proklamadór nian sai malahok hanesan ne’e tanba ida-ne’e dignidade no onra Estadu nian.

Estátua proklamadór Repúblika Demokrátika Timor-Leste no Prezidente dahuluk Timor-Leste nian ne’e inaugura hosi Prezidente Repúblika Francisco Guterres ‘Lú Olo’, iha rotunda Sentru Konvensaun Dili (CCD, sigla portugés) iha 20 maiu 2017,  iha serimónia espesiál ida iha loraik loro-matan monu.

Estátua Proklamadór Francisco Xavier do Amaral iha Avenida Liberdade Imprensa rotunda Merkadu Lama. Imajen Tatoli/Jogerjo Guterres.

Iha momentu ne’e, Ministru Estadu, Dionísio Babo Soares, ne’ebé ninia Ministériu Administrasaun Estatál dezempeña knaar importante ida iha konstrusaun monumentu ne’e nian, loke serimónia ne’e hodi agradese ba prezensa hosi reprezentante família Francisco Xavier do Amaral nian no ba partisipasaun hosi dirijente istóriku sira Timor-Leste nian iha biban espesiál ne’e.

Ema sira-ne’ebé ko’alia iha okaziaun ne’e maka Ministru Planeamentu no Investimentu Estratéjiku, Kay Rala Xanana Gusmão, antigu Primeiru-Ministru Mari Alkatiri, reprezentante ida hosi família Amaral nian no Prezidente Repúblika nian ne’ebé foin simu pose, Francisco Guterres “Lu-Olo”. Sira-ne’ebé marka prezensa mak Primeiru-Ministru, Rui Maria de Araújo, no Ministru sira seluk hosi VI Governu Konstitusionál.

Oradór sira hotu iha serimónia ne’e ko’alia liu kona-ba importánsia hosi monumentu ne’e, atu fó hanoin ba jerasaun foin-sa’e sira no ba jerasaun sira-sei tuir mai kona-ba ema ida-ne’ebé hola parte iha sira-nia istória luta ba libertasaun Timor-Leste nian.

Estátua boot ne’e hatuur iha rotunda besik Sentru Konvensaun Dili (CCD, sigla portugés). Hafoin lansamentu fogu-festa nian, ne’ebé asiste hosi ema rihun ba rihun ne’ebé partisipa iha serimónia ne’e, Prezidente Repúblika asina plaka ne’ebé hatuur iha monumentu ne’e nia huun. Ramata bensaun ba estátua no tau ai-funan no sinál omenajen nian ba figura boot nasionál ne’e, públiku presta ninia respeitu no haksolok iha festa ne’ebé prepara ona iha fatin ne’e.

Painél boot hirak ne’ebé tau hadulas rotunda ne’e hatudu fotografia ikónika, ne’ebé hasai iha momentu halo Proklamasaun ba Independénsia, iha loron 28 fulan-novembru tinan 1975, ho lia-fuan hosi Francisco Xavier do Amaral.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here