Pasiente sira iha Sentru saúde Balibo, (21/06/21). Imajen Tatoli/Sérgio da Cruz.

BOBONARO, 21 juñu 2021 (TATOLI)—Hahú hosi janeiru to’o maiu, iha bebé na’in 86 mak moris iha sentru saúde Balibo, no hosi númeru ne’e na’in-ida mak mate iha dalan, bainhira transfere ba Ospitál Referál Maliana (HRM).

Xefe sentru saúde Balibo, Manuel da Cruz esplika, bebé na’in-ida ne’ebé mate tanba inan partu ho kondisaun la normál.

Notísia relevante:Loron haat, sidadaun Bobonaro 2.854 simu vasina

Buat ne’ebé sai difikuldade ba serbisu saúde iha sentru saúde ne’e maka, bainhira iha tempu udan, tenke hulan de’it maki nan partu sira hosi área izoladu.

“Númeru bebé ne’ebé ita rejista maki da ne’e. Problema maka, iha tempu udan ita tenke hulan inan isin-rua sira ho distánsia ne’ebé dook no ita iha de’it karreta multifunsaun ida,” Manuel da Cruz, hateten ba jornalista Agência Tatoli, iha Balibo segunda ne’e.

Nia rekoñese katak, durante ne’e iha programa ‘Liga-Inan’ ne’ebé fasilita kontaktu mai sentru saúde bainhira inan isin-rua kanotak moras, nune’e pesoál saúde-sira iha postu saúde no sentru saúde bele halo atendimentu, maibé ladún efetivu tanba kestaun barak.

Durante fulan lima, sentru saúde Balibo mós rejista kazu Infeksaun Respiratóriu Agudo (IRA) ho númeru aas liu hamutuk 1.996 ho persentajen 39.9%, tuir kedan diareia 200 ho persentajen 4% no ikus liu maka moras kulit 334 ho persentajen 6,6%.

Ho kazu sira ne’ebé rejistadu, Manuel da Cruz, apela ba komunidade atu kontinua pratika ijiéne ambientál n pesoál hanesan uza mascara no hamos sasan foer sira iha uma.

Sentru saúde Balibo iha funsionáriu permanente na’in 38 no funsionáriu kontratadu hamutuk na’in-tolu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here