Ekipa Servísu Covalima Vitória ho Domin-20, prepara hela lorin nia ema fila ba Uma Knua Covalima. Iha Faról, Segunda (21/06). Imajen Tatoli/Francisco Sony

DILI, 21 juñu 2021 (TATOLI)-Ekipa Servisu Covalima Vitória ho Domin-20 (EKSES-COVID20), segunda ne’e, fasilita tan estudante no komunidade Covalima hamutuk na’in-245 fila-fali ba sira-nia munisípiu.

Notísia Relevante : EKSES fasilita tan Covalima-oan 264 fila ba Covalima

Koordenadór Jerál EKSES-COVID20 ne’ebé destaka iha Munisípiu Dili, Mariano Tilman hateten, dezlokasaun Covalima-oan dala ida-ne’e hanesan faze ikus tanba daudaun ne’e Governu iha ona polítika normaliza fali situasaun COVID-19 iha kapitál Dili.

“Atu dehan de’it katak, esforsu sira ne’ebé durante ne’e ami halo lori Covalima-oan iha Dili ba munisípiu, ohin ne’e, faze ikus nian,” Mariano Tilman hateten ba Agência Tatoli iha Sede RENETIL, Faról, Dili.

Daudaun ne’e Governu hakotu ona konfinamentu obrigatóriu iha Munisípiu Dili no komunidade bele halo fali ona atividade hanesan baibain.

Notísia Relevante : EKSES fasilita estudante Covalima-oan iha Dili fila ba munisípiu

“Ami esforsu fasilita nafatin sira, maibé ami mós servisu voluntáriu ajuda de’it Governu, laiha orsamentu, nune’e iha etapa ikus ida ne’e ami haruka pedidu ba lider karizmátiku  Kay Rala Xanana Gusmão, apoiu orsamentu $1.400 fasilita transporte  Covalima-oan fila-fali ba munisípiu,” Mariano Tilman  tenik.

Karreta sira ne’ebé ohin transporta Covalima-oan ba munisípiu ne’e hamutuk sia (9), kompostu hosi bus hitu (7) no trek rua (2). Hosi karreta sira-ne’e EKSES-COVID20 aluga bus tolu (3) no seluk hetan apoiu hosi Ministériu Transporte no Komunikasaun (MTK), Universidade da Paz ho Universidade Nasionál Timor Lorosa’e (UNTL).

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here