Diretór DTT Covalima, Joaquim Gusmão. Imajen Tatoli/Celestina Teles

COVALIMA, 21 juñu 2021 ( TATOLI) –Hahú janeiru to’o maiu, tinan ne’e,  Diresaun Transporte no Terrestre ( DTT) Munisípiu Covalima kontribui  reseita  $16.061 ba kofre Estadu.

Diretór DTT Covalima, Joaquim Gusmão, informa reseita hirak ne’e mai hosi fonte orsamentu inspesaun ba veíkulu,  lisensa tránzitu renovasaun, karta kondusaun no troka proletáriu

Nia informa, maske Governu aplika   serka sanitária (SS) iha Covalima, maibé  DTT  kontinua halo atendimentu renovasaun  dokumentu veíkulu ba sidadaun-sira ho sentidu kumpre ba protokolu prevensaun COVID-19 nian.

“Maske DTT hasoru difikuldade kona-bá  lá iha edifísiu, ami hala’o servisu uza de’it edifísiu MOP, maibé atendimentu kontinua la’o normál,” Joaquim Gusmão, informa ba Agência Tatoli iha nia serbisu fatin, Covalima, segunda ne’e.

DTT Covalima la’ós de’it halo atendimentu ba kliente sira iha Munisípiu Covalima, maibé halo mós atendimentu ba kliente-sira hosi Postu Administrativu Lolotoe, Munisípiu Bononaro no Munisípiu Ainaro.

DNTT seidauk haruka karta kondisaun 1.000

Biban ne’e,  Diretór DTT Covalima, Joaquim Gusmão, informa to’o agora  Diresaun Nasional Transporte no Transporte (DNTT)  seidauk haruka karta kondusaun 1.000 mai iha Munisípiu Covalima.  Maske, sidadaun sira tuir ona teste iha 2019 atu hetan karta kondusaun.

“Ami haruka hela de’it karta ba nasionál no ha’u haruka ha’u nia funsionáriu konfirma direita iha nasionál. Ohin, ha’u telefone dehan karta kondusaun seidauk iha,” Joaquim Gusmão, haktuir.

Iha tinan 2019 sidadaun trata karta kondisaun hodi tuir ezame hamutuk 2.300 hosi númeru ne’e pasa iha ezame hamutuk 2.221 maibé karta kondisaun 900 mak mai ona Covalima,  hela karta kondisaun 1.000-resin sei pendente iha Dili.

Funsionáriu   DTT Covalima hamutuk na’in-10,  kompostu hosi funsionáriu permanente na’in-rua (2)  no kontratadu na’in-ualu (8).

Hosi númeru  funsionáriu ne’e,  na’in-tolu (3) halo atendimentu iha Fronteira Mota Masin, Salele  no na’in-hitu (7) halo atendimentu iha edifísiu DTT Covalima.

Jornalista       : Celestina Teles 

Editór             : Francisco Simões

HAKEREK NO HATÁN

Please enter your comment!
Please enter your name here