Deputada hosi bankada PLP, Maria Angelina Sarmento. Imajen Egas Cristovão

DILI, 21 juñu 2021 (TATOLI)—Bankada Partidu Libertasaun Populár (PLP) no Kmanek Haburas Unidade Nacional Timor Oan (KHUNTO) la konkorda Sekretariadu Tékniku Administrasaun Eleitorál (STAE) serbisu hamutuk ho Komisaun Nasionál Eleisaun (CNE-sigla portugés) envolve promove edukasaun sívika hodi hasoru eleisaun prezidensiál tanba kompeténsia própria CNE nian.

Notísia Relevante: CNE hato’o paresér ba PN kona-ba pakote lei eleitorál tolu

“Ha’u ladún konkorda ho Governu ne’ebé introdús iha alterasaun ba lei órgaun administrasaun eleitorál atu promove partisipasaun sidadaun nian liuhosi edukasaun sívika ne’e ein-koordenasaun ho STAE, tanba CNE hanesan órgaun administrasaun eleitorál ida-ne’ebé superviziona aktu eleitorál labele iha koordenasaun ho STAE intermu edukasaun sívika. Ida-ne’e kompeténsia propria CNE nian,” Deputada Bankada Partidu Libertasaun Populár (PLP), Maria Angelina Lopes Sarmento, levanta liuhosi plenária, segunda ne’e.

STAE nia kompeténsia atu halo edukasaun votante no bainbain edukasaun votante ne’e mai hosi CNE mak kria regulamentu no prosedimentu tékniku kona-ba aktu eleitorál nian, ne’ebé hosi prosedimentu sira-ne’e mak STAE elabora fali nia programa ka atividade edukasaun votante.

“Ne’ebé, ida promove edukasaun sívika ne’e kompeténsia própriu CNE nian. Ha’u la aseita atu ita-boot sira halo CNE koordena ho ho STAE,” nia subliña.

Entretantu Vise-Xefe Bankada KHUNTO, Deputadu António Verdiál de Sousa, husu tenke separa kompeténsia entre CNE no STAE.

“Di’akliu idak-idak hala’o nia kna’ar. Ne’ebé, favór ida toma konsiderasaun ba órgaun administrasaun eleitorál rua ne’e,” Vise-Xefe Bankada KHUNTO ne’e fó hanoin.

Hatán ba preokupasaun ne’e, Ministru Administrasaun Estatal Miguel Pereira de Carvalho, esplika iha lei atuál ka lei órgaun administrasaun eleitorál kompeténsia CNE nian ida mak aprova regulamentu sira ba aktu eleitorál maibé iha eleisaun 2017 no 2018 regulamentu ba aktu eleitorál ne’e halo fali ho dekretu Governu.

Nia hatutan, iha lei atuál dehan CNE mak tenke aprova regularmentasaun sira maibé CNE la halo, maibé Governu mak halo entaun Governu hanoin katak atubele fó legalidade ba aktu administrativa hodi kumpre lei ne’ebé iha no regulariza prátika  sira.

“Governu la hanoin atu halo intervensaun ba CNE nian maibé Governu hanoin presiza iha koordenasaun ne’ebé mak di’ak liután entre STAE ho CNE. CNE halo edukasaun sívika no STAE halo edukasaun votante. Iha prátika bainhira CNE halo edukasaun sívika hodi informa ba eleitór sira kona-ba prátika sira oinsá halo eleisaun entaun STAE hanoin katak importante tebes bainhira halo edukasaun sívika ba ita-nia populasaun sira-ne’ebé mak relasaun ho aktu eleitorál,” Governante ne’e hateten.

Dalaruma matéria sira-ne’e, nia dehan, iha relasaun ho edukasaun votante, entaun importante tebes órgaun administrasaun eleitoral rua ne’e serbisu hamutuk.

“Espíritu hosi revizaun ba lei ida-ne’e atubele órgaun administrasaun eleitorál rua ne’e serbisu hamutuk di’ak liután,” nia dehan.

Nia fundamenta, Governu nia proposta bazea ba imperativu konstituisaun artigu 115 alínea 3 ne’ebé deputadu sira aprova ne’ebé hatuur katak matéria organizasaun no funsionamentu administrasaun, tantu direta no indireta Estadu ne’e kompeténsia eskluziva Governu nian.

Notísia Relevante: Komisaun A sei tetu paresér hosi CNE

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here