Interface aplikasaun mobile MyFood. Imajen/Telkomcel

DILI, 21 juñu 2021 (TATOLI)–Operadór telekomunikasaun Telekomcel lansa aplikasaun mobile MyFood, ne’ebé disponível ba plataforma Android, hodi fasilita negosiante mikro, kiik no mediu halo transasaun fa’an no sosa sasán ho kliente iha ámbitu COVID-19 iha Timor-Leste.

Diretór Ezekutivu Telkomcel, Yogi Rizkian Bahar, hateten, plataforma ne’e hanesan parte foun ida hosi aplikasaun MyTimor úniku ne’ebé lansa ona.

“Antes ne’e, ami lansa ona MyTimor, hanesan aplikasaun ba dahuluk iha Timor-Leste ne’ebé permite motorizada no taxi online tula pasajeiru no manda sasán. Ida-ne’e hanesan inovasaun dijitál hosi Telkomcel hahú hosi dezembru 2020. Servisu MyFood, signifika aplikasaun la’ós de’it bele manda sasán, maibé bele mós manda hahan to’o iha kliente nia uma oin,” refere nota ne’ebé Agência TATOLI asesu, segunda ne’e.

Inisiativa kria aplikasaun ne’e tanba empreza telekomunikasaun ne’e observa katak Governu Timor-Leste aplika Estadu Emerjénsia no Serka Sanitária, ne’ebé limita movimentu hodi labele halibur ema barak, maibé halo movimentu ekonomia komunidade ladún la’o efetivu no fó impaktu boot ba setór negósiu sira, liuliu negosiante mikro, kiik no mediu sira.

“MyFood bele sai hanesan aplikasaun ne’ebé ajuda movimentu ekonomia iha situasaun Estadu  Emerjénsia,” afirma nota hosi empreza indonéziu ne’e.

Plataforma ne’e fasilita negósiu restorante sira iha kapitál Dili bele dezenvolve no hasa’e transasaun liuhosi maneira digitál no fasil ba kliente sira hodi hameno hahan hosi ne’ebe de’it no banhira de’it.

Utilizadór aplikasaun ne’e sa’e rápidamente 80,%, desde inísiu lansa to’o agora.

MyTimor kolabora hamutuk ho ajente transporte lokál no oferese oportunidade ba komunidade sira ne’ebé hakarak serbisu nu’udar motorista ba motorizada no taxi, ho ninia kreximentu ba utilizadór motorista 17%.

MyTimor kolabora ona ho restaurante 80 iha kapitál Dili, ne’ebé hetan ona sertifikadu iha Timor-Leste.

Prezensa MyFood hanesan mós responsável sosiál hosi Telkomcel ba komunidade Timor-Leste, liuliu ba negósiu iha nível mikro, kiiik no mediu sira, tanba dadus no peskiza hatudu katak dezenvolvimentu negosiante hirak ne’e hanesan pilar ekonomia ba komunidade no sei ajuda hasa’e kreximentu ekonomia no rekuperasaun akonómika nasionál.

Telkomcel hanesan operadór telekomunikasaun subsidiáriu hosi Kompañia Telin, Telkom Group, ne’ebé rekoñese Timor-Leste hanesan nasaun dezenvolvidu, ne’ebé nia jerasaun mileniál ativu tebes iha utilizasaun teknolojia.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here