Eis Ministru Agrikultura no Peska (MAP), Estanislau da Conceição Aleixo Maria da Silva, marka prezensa iha TDD, tersa (27/10/2020). Imajen Tatoli/António Gonçalves

DILI, 21 juñu 2021 (TATOLI)—Advogadu privadu Pedro Aparicio Guterres, ne’ebé fó asisténsia legál ba eis Prezidente Ajénsia Espesializada ba Investimentu (AEI), Felisberto Araújo Duarte, sei hein despaixu hosi Tribunál Distritál Dili (TDD), atu bele hatama rekursu ba Tribunál Rekursu (TR).

Ami hatama ona pedidu rekursu, maibé TDD seidauk foti despaixu katak simu ami-nia rekursu ka la’e. Tanba ne’e, agora ami hein hela desizaun bainhira sai hodi fó prazu mai ami atu hatama rekursu fila-fali ba iha TR,” Pedro Aparicio hateten ba jornalista-sira iha edifísiu TDD, segunda ne’e.

Notísia relevante:Tribunál rona sasin ba kontestasaun hasoru eis ministru Estanislau

Pedro Aparicio,  hatutan normalmente Tribunál sempre admite bainhira hatama iha prazu loron sanulu-nia laran, maibé tanba durante ne’e Governu aplika hela serka sanitária no konfinamentu domisialiáriu, nune’e prosesu hotu pendente.

Parte advogadu halo rekursu tanba la aseita ho desizaun Tribunál primeira instánsia ne’ebé hateten la simu pedidu hosi parte defeza, mezmu parte rekerente konsidera eis Ministru Agrikultura no Peska  (MAP) no ministru Koordenadór ba Asuntu Ekonómiku (MECAE), Estanislau da Conceição Aleixo Maria da Silva, iha altura ne’ebá foti desizaun hodi hapara prezidente AEI  la tuir prosesu legál, tanba loloos bainhira hapara ema ida tenke liu hosi prosesu disiplinár maibé ida ne’e laiha.

Tanba ne’e, halo rekursu ba TR nu’udár Tribunál ne’ebé aas liu hodi bele halo apresiasaun ba desizaun Tribunál primeira instánsia.

Kontestasaun ba prosesu ne’e sivíl halo hosi parte rekerrente ka vítima liuhosi advogadu privadu Pedro Aparicio Guterres, kontra eis ministru Estanislau Aleixo da Silva, ne’ebé parte Ministériu Públiku (MP) reprezenta hosi Prokuradór Pascásio de Roza Alves.

Hosi parte rekerente halo kontestasaun hasoru eis ministru Estanislau ne’ebé iha loron 30 juñu 2015 hasai desizaun hodi ‘ezonera’ prezidente AEI.

Maibé, liu hosi desizaun Tribunál primeira instánsia nian, katak eis ministru MAP no MECAE nian foti hodi ezonera prezidente AEI iha  altura ne’eba loos no la viola lei.

Notísia relevante:Eis-ministru Estanislau ‘’ezonera’’ prezidente AEI tuir lei

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here