Líder Karismátiku Kay Rala Xanana Gusmão huu lilin aniversáriu ba dala-75 (20 juñu 1946-20 juñu 2021). Imajen Tatoli/Nelson de Sousa

DILI, 20 juñu 2021 (TATOLI)—Reitór Semináriu Menór Nossa Senhora de Fátima, Balide, Pe. Angelo Salsinha, hateten Líder Karismátiku Kay Rala Xanana Gusmão nia peregrinasaun moris nakonu ho sakrifisiu ne’ebé lori roman no esperansa ba povu Timor-Leste.

Imajen Tatoli/Nelson de Sousa.

“Roman no esperansa ne’ebé iha Xanana ninia aan la hatudu de’it iha tempu balun. Maibé, iha tempu tomak bainhira Timor-oan sira lakon esperansa, Xanana lori roman esperansa ba-sira,” Padre Angelho Salsinha hateten liuhosi omilia iha misa agradesimentu ba Xanana Gusmão nia aniversáriu ba dala-75 iha Igreja Semináriu Menór Nosa Senhora de Fatima, Balide, Dili, domingu ne’e.

Ezemplu, nia esplika, iha tempu funu bainhira ema hotu lakon esperansa tanba situasaun balun, Xanana Gusmão mosu mai lori esperansa ba luta-na’in sira hodi organiza funu to’o bele liberta povu hosi kolonializmu nia ukun.

Iha tempu uku aan nia laran ne’e, Xanana sai nafatin roman no esperansa ba timor-oan sira hodi serbí povu liuhosi involvimentu direta iha Governu hodi hametin Estadu no responde ba povu nia preokupasaun liuhosi dezenvolvimentu nasionál.

Ezempu konkretu, tuir nia, ne’ebé seidauk lakon hosi timor-oan sira nia hanoin mak iha akontesimentu inundasaun 04 abríl bainhira povu iha Dili moris iha terus (sofre) nia laran, Xanana lori esperansa ba povu konkretamente fó apoiu ba maluk sira-ne’ebé hela Maslidun, Lagoa Tasi-Tolu.

“Mai ita harohan ba Maromak atu haraik isin di’ak ba ita-nia maun, aman, avó no ita hotu-nia líder Xanana Gusmão, atu haraik isin di’ak nafatin hodi sai roman no esperansa ba rai no povu Timor-Leste,” Amo Angelo harohan.

Nune’e mós misionáriu portugés ida-ne’ebé hala’o misaun iha Timor hahú hosi 1974 to’o ohin loron, Padre José Alves Martins, SJ, konsidera Xanana Gusmão nu’udár ema-ne’ebé fó vida totál ba rai no povu ida-ne’e.

“Ha’u laiha buat ida atu fó maibé ha’u-nia orasaun sempre akompaña Xanana bainhira ha’u halo misa, ha’u reza no reza atu bele kontinua serbi povu ho domin Xanana idéntiku ho povu no povu mak Xanana,” Padre José Alves Martins hateten.

Imajen Tatoli/Nelson de Sousa.

Hafoin ramata misa agradesimentu, família boot Semináriu Nossa Senhora de Fátima Balide, oferese serimónia simples nakonu ho amizade hodi ko’a keek aniversáriu-nian iha refetóriu semináriu Balide.

Iha misa agradeseimentu ne’e, Líder karismátiku Kay Rala Xanana Gusmão hato’o agradese ba Maromak ba grasa moris-nian tanba kompleta ona moris to’o halo aniversáriu ba dala-75 (20 juñu 1946-20 juñu 2021).

“Agradese ba Maromak, ba grasa moris-nian. Agradese ba Amo-sira, seminarista-sira no maluk-sira-ne’ebé reza mai ha’u iha misa ida-ne’e,” Xanana Gusmão hato’o sentidu agradesimentu ne’e iha misa agradesimentu ne’ebé oferese hosi Semináriu Menór Nossa Senhora de Fátima, Balide, ne’ebé prezide hosi Pe. Angelo Salsinha.

Biografia

Kay Rala Xanana Gusmão, moris iha 20 juñu 1946, iha Manatuto, Timor-Leste hamutuk ho alin mane ida (1) no feto na’in-lima (5). Kaben ho Emília Baptista 1969 (div) oan na’in-rua (2) no kaben ho Kristy Sword Gusmão, 2000 oan na’in-tolu (3).

Bainhira remata eskola ensinu primáriu, hahú fali ensinu sekundáriu iha missaun Katólika Nossa Senhora de Fátima iha Dare, hafoin mai fali iha Díli.

Hahú servisu sedu liu, hala’o funsaun fiskál iha obra aban bain rua nian no lorokraik hanorin iha eskola Xineza.

Iha fulan Abril tinan 1974, hala’o serviço iha Redasaun “Lian Timor nian” (Avós Timor).

Hafoin Revolução dos Cravo (revolusaun aifunan) iha Portugal iha loron 25 fulan-abril tinan 1974, no Timor-Leste hetan oportunidade ba auto-determinasaun no independénsia, Kay Rala Xanana Gusmão deside hamutuk hó partidu Associação Sociál Demokrata Timorense (ASDT), ne’ebé foin hahú atu forma no iha tinan ida-ne’e duni, transforma iha Frente Revolusionária Timor-Leste Independente (FRETILIN).

Hala’o servisu hanesan jornalista no fotógrafu, Kayrala Xanana Gusmão, asume kargu nu’udar Direktor Adjuntu ba Departamentu informasaun partidu (FRETILIN) nian.

Iha loron 07 fulan-dezembru tinan 1975, hafoin tropa Indonézia halo tiha invazaun fronteriza armada iha teritóriu Timor-Leste, Indonézia deside invade kapitál Díli.

Hafoin Prezidente FRETILIN Nicolau Lobato mate iha fulan-dezembru tinan 1978, hamutuk ho Membru Comité Central FRETILIN nian, Kayrala Xanana Gusmão, simu knaar hodi organiza hikas fali luta.

Iha fulan-marsu tinan 1981, organiza Konferénsia Nasionál FRETILIN nian ba dahuluk, durante ne’e, foti nia nu’udar líder Rezisténsia no Komandante-Chefe das Falintil nian (Forsa Armada Libertasaun Nasionál Timor-Leste).

Iha fulan-marsu tinan 1983, Ka Rrala Xanana Gusmão hatudu nia pragmatizmu, bainhira hahú hala’o negosiasaun formál ho Forsa Armada Indonézia nian (ABRI/TNI) hodi halo sesar-fogu, ne’ebé dura to’o fulan-agostu tinan 1983 ne’e.

Kay Rala Xanana Gusmão harii no dezenvolve Polítika Unidade Nasionál ne’ebé hatudu iha kooperasaun ativa ho membru Igreja Katólika no ho autoridade tranzitória Timor-Leste, Kay Rala Xanana Gusmão aproveita fulan lima sesar-fogu hodi dezenvolve rede organizada klandestina nasionál nian ba dala uluk, ne’ebé ema hatene hanesan “Frente Klandestina”.

Iha tinan 1988, susesu ba inisiativa Unidade Nasionál lori Kayrala Xanana Gusmão harí CNRM-Concelho Nasionál Rezisténsia Maubere, hanesan espresaun komandu nasionál apartidáriu luta nian; CNRM ne’ebé tuir mai CNRT, Concelho Nasionál Rezisténsia Timorense.

Tinan ida hafoin masakre Santa Kruz, no hafoin hala’o tiha iha guerrilla tinan 17 nia laran, ema kaptura Kay Rala Xanana Gusmão iha loron 20 fulan-novembru tinan 1992 iha kapitál Díli. Maske hetan elojiu iha nível internasionál, Kay Rala Xanana Gusmão sai nu’udar alvu hodi simu julgamentu hanesan sena ida no dadur iha prizaun ida-ne’ebé destinadu ba kriminozu komún. Maibé, tanba presaun hosi komunidade internasional, autoridade indonézia sira, obrigadu halo nia tranferénsia ba Prizaun Cipinang, rezervadu ba prezu polítiku sira.

Iha prizaun, Xanana Gusmão, dedika nia tempu hodi halo estratéjia ba Rezisténsia, hodi estuda mos lian indonéziu, inglés no direitu. Nia mós halo pintura no hakerek poezia, haki’ak nia talentu ida-ne’ebé hatene tiha ona iha tinan 1975, bainhira nia manan Prémiu Timorense ba Poezia ho titulu “Mauberíadas”.

Nia pintura balu faan tiha ona no proveitu hosi pintura hirak ne’e, Xanana Gusmão oferese ba Rezisténsia. Iha tinan 1994, nia ensaiu polítiku balun, publika tiha ona iha livru ida, Timor-Leste – Povu ida, Pátria ida, Ed.Kolibri,Lisboa.

Iha Abril tinan 1998, iha Convencao Nasionál Timorense iha diáspora, ne’ebé estabelese Concelho Nasionál Rezisténsia Timorense (CNRT) nian, Xanana Gusmão reafirma tiha ona ho aklamasaun hanesan líder Rezisténsia Timorense no Prezidente CNRT.

Tuir mai iha presaun internasionál ne’ebé makaas liután kona-bá libertasaun Xanana Gusmão nian no deklasaun hosi Prezidente Indonézia Habibie, hodi promete atu fó independénsia ba Timor-Leste, bainhira hala’o konsulta popular (referendu) iha país ida-ne’e, rejeita planu autonomia ne’ebé hato’o hosi governu Indonézia, Kay Rala Xanana Gusmão transferidu ba Prizaun Cipinang iha loron 10 fulan, Fevereiru, tinan 1999, hodi ba fali iha prizaun domisiliária iha Salemba, parte sentrál Jakarta nian.

Prosesu dezenvolvimentu polítiku timorense hala’o lalais los no rekoñesimentu internasionál jeneralizadu hosi kualidade Xanana Gusmão nian hanesan estadista no líder, nu’udar razaun atu hetan vizita barak-barak ba nia uma prizaun nian, hosi parte Governu estranjeiru, inklui mós Sekretária Estadu EUA, Madaleine Albright, eis Prezidente EUA, Jimmy Carter, Ministru Negósiu Estranjeiru Austrália Alexander Downer no Ministru Negósiu Estranjeiru, Japaun Masahiko Komura.

Referendu patrosinadu hosi Organizasaun Nasun Unida (ONU) iha loron 30 fulan-agostu tinan 1999, proposta ba autonomia ne’ebé hato’o hosi Indonézia rejeitada ho modo esmagador, hatudu sinál katak tenke hakotu duni okupasaun indonézia iha Timor-Leste no hahú prosesu tranzisaun ne’ebé lidera hosi ONU iha Timor-Leste. Ida-ne’e, hanesan aktu demokrátiku ba dahuluk iha istória Timor-Leste nian.

Iha loroo 07 fulan setembru tinan 1999, Kay Rala Xanana Gusmão, sai hosi prizaun domisiliária. Iha fulan-agostu tinan 2000, hala’o Kongresu Nasionál CNRT nian iha Dili ba dahuluk, hodi foti Kay Rala Xanana Gusmão nu’udar Prezidente CNRT/Kongresu Nasionál. Iha fulan Novembru, tinan 2000 to’o fulan-abril tinan 2001, Kay Rala Xanana Gusmão sai hanesan Portavós ba Konsellu Nasionál, órgaun lejislativu ida-ne’ebé timor-ona nian duni, iha Administrasaun Tranzitória Timor-Leste, kompostu hosi reprezentante partidu polítiku sira, sosiedade sivil, grupu pós autonomia no krensa relijioza oioin.

CNRT/CN disolvidu iha loron 9 fulan-juñu tinan 2001. Hafoin hala’o tiha disolusaun CNRT/CN, Kay Rala Xananna Gusmão konsentra nia esforsu iha Asosiasaun Veteranu Rezisténsia (AVR), organizasaun ida-ne’ebé halo parte membru antigu sira hosi Frente Klandestina, atu kria kondisaun ba sira-nia partisipasaun kualifikada iha prosesu dezenvolvimentu país nian.

Iha loron 14 fulan-abril tinan 2002, Kay Rala Xanana Gusmão eleitu hanesan Prezidente Timor-Leste hodi simu pose hanesan Prezidente Repúblika Demokrátika Timor-Leste iha loron 20 fulan-maiu tinan 2002, nu’udar Prezidente Repúblika to’o finál ba nia mandatu iha fulan-maiu tinan 2007.

Hafoin husik tiha Prezidénsia, Kay Rala Xanana Gusmão, eleitu hanesan Prezidente Partidu polítiku Kongressu Nasionál ba Rekonstrusaun Timor-Leste (CNRT, sigla portugés), ne’ebé forma iha fulan-abril tinan 2007. Iha fulan-juñu nia laran, Kay Rala Xanana Gusmão, hala’o kampaña ba eleisaun lejislativa iha nasaun laran tomak. Iha loron 30 fulan-juñu hala’o eleisaun lejislativa, ne’ebé CNRT simu iha segundu númeru, boot liu iha votu no hodi forma kedas aliansa ida ho partidu polítiku tolu mak PD (Partidu Demokrátiku) no Koligasaun ASDT-PSD, husi aliansa ne’e hanaran AMP (Aliansa Maioria Parlamentar) no hodi garante asentu iha Parlamentu Nasionál 37 hosi 65.

Iha loron 03 fulan-agostu tinan 2007, Prezidente Repúblika, Dr. José Ramos Horta, konvida ofisialmente AMP atu forma Governu tuir mai.

Iha loron 08 fulan-agostu tinan 2007, iha Palásiu Nobre Lahane, Kay Rala Xanana Gusmão, simu pose IV Governu Konstitusionál nu’udar Primeiru-Ministru Repúblika Demokrátika Timor-Leste no mandatu ba Governu sei hakotu iha tinan 2012.

Loron 07 fulan-jullu tinan 2012, iha eleisaun lejislativa, CNRT hetan votu sira boot liu hodi garante asentu 30 hosi asentu 65 iha Parlamentu Nasionál. CNRT forma koligasaun ho PD no Frente Mudansa hodi asegura hamutuk asentu 40 ba Bloku Koligasaun hosi partidu tolu nian.

Partidu koligasaun hetan konvite atu forma Governu hosi Prezidente Repúblika ne’ebé mós mak foin eleitu, Taur Matan Ruak no iha loron 08 fulan-agostu 2012, V Governu Constitucional [Governu Konstitusionál da-V] simu pose bainhira IV Governu [Governu da-IV] kompleta loloos ninia Governasaun tinan lima (5). Kay Rala Xanana Gusmão simu pose nu’udar Primeiru-Ministro no Ministru Defeza no Seguransa ba mandatu daruak tinan lima nian.

Jornalista : Nelson de Sousa

Editór       : Cancio Ximenes

HAKEREK NO HATÁN

Please enter your comment!
Please enter your name here