Memensio Sequeira Freitas.

Hosi:

Memensio Sequeira Freitas 

Batalla polítika iha ita nia rain sempre dada atensaun no preokupasaun hosi sidadaun sira, liu-liu hosi sírkulu akademista no polítiku sira. Batalla polítika ida ne’e atraídu tebes tanba sempre envolve iha diskusaun sira, figura rua importante iha nasaun ida ne’e mak Kayrala Xanana Gusmão versu doutór Marí Alkatiri iha aspetu sa’ida de’it ligadu ho situasaun polítika. Figura na’in rua ne’e hanesan tiha superfísie moeda ida, iha ladu sorin iha señór Xanana no ladu seluk iha doutór Marí Alkatiri.

Dala barak diskusaun sira aserka figura na’in rua ne’e sai manas liu, bainhira parte ida foti figura ida no riba ba rai figura ida seluk, gava ida no minimiza ida seluk. Diskusaun sira hanesan ne’e la mai de’it hosi parte ida, mas akontese resíprokamente hosi parte rua, liu-liu hosi idaidak nia adeptu sira. Hosi ne’e, ita bele sukat mós adeptu no adversáriu polítika entre figura no líder na’in rua ne’e. Ba ha’u, sira na’in rua iha ninia dón rasik ne’ebé la hanesan no konserteza, ho karáter ne’ebé diferente tebes. Tanba ne’e imposível tebtebes se ita hakarak sira na’in rua halo no ko’alia buat ne’ebé hanesan. Ida ne’e sei nunka bele akontese to’o sira sees aan hosi ita tomak nia leet.

Iha okaziaun ida ne’e, ha’u hakarak dada oituan atensaun sani-na’in sira nian kona-ba Kayrala Xanana Gusmão hanesan estatutu “mitu” ida no líder “verdadeiru” ida habaze ba diskusaun sira aserka desmistifikasaun ne’ebé ema barak foti iha mídia sira relasionadu ho deklarasaun hosi doutór Marí Alkatiri hasoru Kayrala Xanana Gusmão hanesan adversáriu prinspál iha vida polítika (la’ós nu’udar inimigu boot ida nem inimigu simples).

Kayrala Xanana Gusmão iha ninia estatutu “MITU”?

Kayrala Xanana Gusmão ne’e la’ós de’it líder partidu CNRT nian maibé nia líder nasaun ida ne’e nian, líder másimu rezisténsia nian hafoin Nicolao Lobato no membru tomak CCF nian mate iha baze de apoiu, património Estadu no aman Nasaun ida ne’e nian. Estatutu Xanana nian ida ne’e nem ema ida bele hasai, sá tan dudu sees tuir ema ida nia gostu.

Dezde Kayrala Xanana Gusmão reorganiza fila fali funu no asume nu’udar comandante em chefe das FALINTIL, nia sai ona lÍder ida to’o ohin loron. J. Donald Walters (eskritór Art of Leadership) iha Beny Gomulya (2018) hateten “lideransan mak oportunidade ida atu serví”. Lideransa la’ós kestaun pozisaun, títulu, estatutu ka kargu. Iha ema barak mak la iha pozisaun, mas nia serbí no iha influénsia nune’e hetan adeptu barak. Pelu kontráriu, ema barak mak tuur iha pozisaun serta balu, mas loloos sira la’ós lideransa, tanba sira la serbí no la iha influénsia. Liafuan Walters nian ne’e iha razaun no ha’u hanoin katak Kayrala Xanana Gusmão nia personajen ida mak ne’e duni. Katak nia atu iha kargu ka la iha kargu, Xanana Gusmão é  a verdadeira liderança, tanba nia hatene serbí no iha kapasidade atu influénsia ema seluk.

Ba ha’u, buat ne’ebé doutor Marí foti kona ba estatutu mitu mak ida ne’e duni, katak biar Xanana iha kargu ka la iha kargu, Xanana sempre impoin ninia ideia no vontade ruma relasiona ho governasaun. Hanesan buat ne’ebé akontese ba VIII Governu Konstitusionál (VIII Governu ala AMP II), Xanana Gusmão sempre serbí povu no rai ida ne’e liu hosi impoin nia ideia ruma. Até ke la asume kargu ofisiál ruma Estadu nian, Xanana sempre preokupa ho povu nia moris, hanesan asaun sira ne’ebé nia sempre halo iha momentu serta kuandu la iha líder seluk tuun direta atu atende povu nia halerik. Ha’u la dehan líder seluk la halo kualker asaun ruma, mas buat barak ne’ebé Xanana halo, líder seluk iha rai ne’e la bele halo.

Teoria lideransa no mitu sira aserka lideransa

Tantu Sua Exelénsia Kayrala Xanana Gusmão komu doutor Marí Alkatiri, sira na’in rua nu’udar líder ida ne’ebé forte tebtebes iha vida polítika Timor-Leste nian. Sira na’in rua nia komportamentu no deklarasaun polítika sira hotu influénsia vida polítika partidu ne’ebé sira lidera inklui fó impaktu (tantu pozitiva komu negativa) ba vida Estadu nian.

Tannenbaum et al (1970) ilustra lideransa nu’udar infuénsia interpersonál ne’ebé halo iha kontestu determinadu no hala’o liu hosi prosesu komunikasaun umana ho intensaun atu atinje objetivu determinadu balu. Enkuantu Harsey no Blanchard (1988) konsidera lideransa nu’udar prosesu influénsia atividade sira membru ka grupu nian ba atinje sira nia metas ka objetivu.

Atinje esforsu ne’ebé posibilita alkansa objetivu iha situasaun espesífiku ka determinadu ruma. Se ita haree ba personajen sira hanesan Kayrala Xanana Gusmão no doutor Marí Alkatiri iha vida partidu ne’ebé sira lidera daudaun ne’e, sira na’in rua idaidak iha duni influénsia ba partidu refere. Kayrala Xanana Gusmão iha influénsia istoriamente ajuda tan ho karizma ne’ebé nia iha, influensia tebtebes ba polítika tomak partidu nian. Enkuantu doutór Marí Alkatiri iha influénsia istoriamente ho partidu ne’ebé nia sai Sekretáriu jerál ba. Purtantu, ideia xave hosi Tannenbaum no Harsey hotu-hotu foka ba liafuan influénsia líder ida nian ba grupu ka organizasaun ruma.

Se ita haree ba tipu lideransa hosi teoria balun kona-ba lideransa ne’e rasik, ita bele sita pelumenus tipu lideransa sira hanesan tipu autoridade (autocrat), paternalístiku, karizmátiku, demokrátiku no tipu militarístiku. Kayrala Xanana Gusmão ninia vantajen (kelebihan) mak nia iha tipu lideransa karizmátiku ke kuaze ema hotu iha Timór no inklui nível mundiál hatene. Tipu lideransa karizmátiku ne’e iha poder atraisaun boot ne’ebé bele influénsia ema seluk. Kartono (2010) deskreve katak ho forsa karizma ne’eb’e líder ida iha, halo nia sei hetan adeptu no seguidor barak. De facto, fenómeno ida ne’e ita la bele nega, basá, ema ne’ebé simpatia no hadomi Kayrala Xanana Gusmão ne’e sura la bele (barak liu tuir avo Nana la’ós nu’udar prezidente partidu CNRT mas tanba figura Xanana rasik).

Líder karizmátiku ida mak líder ne’ebé hetan admirasaun hosi ema barak no ema sira ne’ebé tuir nia la esplika konkretamente tanba sá sira admira ho líder ida ne’e. Líder ka ema sira ne’ebé iha karizma, soin forsa maravilozu no asaun hotu-hotu ne’ebé nia halo sempre hetan admirasaun no apresiasaun boot, mezmu ema balu la dún aseita karik ho asaun espesífiku ne’ebé líder ne’e halo. Se ita haree ba personajen hanesan Xanana Gusmão, nia iha duni forsa karizmátiku no tanba ne’e ema barak sente admiradu no hadomi Xanana hanesan líder boot ida durante nia vida tomak.

Maibé, tanba sá mak doutór Marí konsidera señór Xanana ho estatutu mitu? Se ita haree oituan ba deskrisaun Jhon C. Maxwel (2007) nia teoria kona-ba ‘O Líder 360o, nia hatuur mitu lubuk ida kona-ba lideransa ne’e rasik. Mitu lideransa nian ne’ebé Maxwel hatuur iha ninia teoria mak hanesan O mito da posição, o mito do destino, o mito da influência, o mito da inexperiência, o mito da liberdade, o mito do potencial e o mito do tudo ou nada. Hosi mitu 7 ne’e, ha’u atraidu liu ho o mito da posição no o mito da influência, tanba mitu rua ne’e ha’u haree belit hela iha avo Nana nia karáter.

Iha o mito da posição, ha’u hanoin biar señór Xanana la kaer kargu polítika ruma Estadu nian mas nia sempre líder  ida nafatin. Tanba nia konxiente nia aan hanesan líder ida, dala barak nia impoin hanoin ruma, opiniaun ruma hodi bele tulun Estadu foti desizaun ruma ne’ebé benefisia Estadu tomak. Titulár Estadu nian sira mak tenke tetu didi’ak se ideia ka opiniuan ne’ebé líder ida fó ne’e bele utiliza ka lae, iha vantajen ba Estadu ka lae? Se hanoin katak opiniaun ida ne’e serve, la sala se Estadu opta hanesan desizaun ida. Purtantu, Maxwel hanoin katak la presiza tuur iha kargu topu hosi kualker instituisaun ida atu sai líder. Pozisaun topu la halo kedas ema ida sai líder no pelu kontráriu, pozisaun nu’udar ema baibain ida mós la limita ema ida nia kapasidade atu sai líder. Doutor Marí mós dala ruma halo ida ne’e, liu-liu ba VIII Governu viabilizadu. Hosi ne’e, se iha estatutu mitu karik, sira na’in rua hotu-hotu konsideradu nu’udar mitu.

Mitu daruak ne’ebé interesante hosi Maxwel nia ideia mak o mito da influência. Ba nia, ema ida bele simu pozisaun sa’ida de’it mas la garante katak ema ne’e líder verdadeiru ida. Pozisaun sempre dezafia ema atu hatudu sira nia kapasidade lideransa nian. Tanba lideransa ne’ebé di’ak sei hetan apresiasaun di’ak hosi ema barak. Haree ba estrutura VIII Governu Konstitusionál ala AMP, aleinde PM TMR, la iha tan Membru Governu ida mak sai hanesan líder momentu ne’ebá. No hanesan prezidente AMP, Xanana Gusmão iha influénsia boot ba formasaun Governu no atribui fiar ba figura idaidak atu asume kargu Estadu nian, enkuantu Xanana rasik prefere hela iha li’ur atu tulun de’it Governu liu hosi maneira rasik ne’ebé nia iha. Dala ida tan, iha aspetu ida ne’e mós maun boot na’in rua hotu-hotu iha estatu mitu, basá, sira hotu iha influénsia ba vida Estadu nian.

Se ita haree ba deklarasaun doutór Marí Alkatiri ba Kayrala Xanana Gusmão nu’udar ema ho estatutu mitu karik tanba iha VIII Governu ala AMP II, señór Xanana sempre impoin ideia no opiniaun balu ba Governu. Lembra katak iha altura ne’ebá, Kayrala Xanana Gusmão la tama iha estrutura Governu nian (tana rejeita atu simu pose) maibé, Xanana nu’udar prezidente AMP no liu ida ne’e hanesan líder ida. Dala ida tan, nia la manda mas impoin ideia, se Governu altura ne’ebá halo tuir sa’ida mak Xanana Gusmão impoin, ida ne’e tanba Xanana iha ninia influénsia hanesan líder ida.

Atu taka, liu hosi okaziaun ida ne’e, iha ámbitu aniversáriu ba dala 75 hosi ita nia líder boot Kayrala Xanana Gusmão, hanesan foin sa’e no povu baibain ida, ha’u hakarak felisita mós ha’u-nia votu parabéns ba líder verdadeiru ida ne’e. Ha’u dejezu katak Maromak sei tulun nafatin avo Nana, eroi no mártir sira hotu no rai lulik ida ne’e sei bali nafatin avo Nana atu isin di’ak nafatin hodi tau matan nafatin ba lala’ok Povu no Nasaun ida ne’e nian. Líder horseik, líder ohin no líder ba nafatin.

Hein katak, loron ruma, molok ita nia líder sira husik hela rai ida ne’e, sira bele junta fali sira nia diverjénsia sira, nu’udar legadu murak ida ne’ebé rai hela ba jerasaun sira rai ida ne’e nian atu la’o tuir. Tantu Kayrala Xanana Gusmão komu doutor Marí, sira hotu nu’udar líder ne’ebé iha ninia pontu mais no pontu menus idaidaik.

Hakerek na’in nu’udar manorin ida iha Eskola Sekundária Públika 12 de Novembru Dili no hela iha Manleuana Dili.

HAKEREK NO HATÁN

Please enter your comment!
Please enter your name here