iklan

EKONOMIA, BAUCAU, HEADLINE

Rendimentu Restaurante Amalia menus tanba serka sanitária

Rendimentu Restaurante Amalia menus tanba serka sanitária

Jestór Restaurante Amalia, Agostinho da Costa. Imajen Tatoli/Natalino Belo.

BAUCAU, 20 juñu 2021 (TATOLI)—Jestór Restaurante Amalia, Agostinho da Costa, hateten implementasaun serka sanitária iha munisípiu Baucau fó impkatu ba rendimentu tanba vizitante menus.

“Serka sanitaria ne’e ema mós la mai. Ne’ebé, agora ami-nia negosiu la la’o tanba kuaze komesa hosi implementasaun serka sanitária ne’e dalan sira taka. Lahatene loos, bainhira mak dalan ne’e loke fali. Se nafatin hanesan ne’e, ami-nia negósiu ne’e rendimentu menus,” Agostinho da Costa hateten ba Agência Tatoli, iha restaurante Amalia, Baucau Vila Antiga, domingu ne’e.

Agostinho esplika, diferensa entre antes no hafoin inplementasaun serka sanitária ne’e hanesan movimentu ema hosi Dili-Baucau menus. Uluk ne’e tanba destinasaun ba Lospalos no Viqueque barak liu deskansa iha Baucau, entaun bele fó rendimentu maibé agora ne’e susar atu hetan rendimentu.

Restaurante Amália nia kliente, nia dehan, barak liu vizitante sira hosi Timor-oan no estranjeiru sira-ne’ebé vizita Baucau inklui halo viajen ba-mai Dili, Baucau, Lospalos inklui Viqueque.

Antes ne’e, iha situasaun normál rendimentu ne’ebé nia hetan ne’e mínimu liu mak $5 maibé hafoin Governu inplementa serka sanitaria ne’e rendimentu menus, dalaruma kuaze loron tomak rendimentu laek tanba laiha vizitante.

“Antes aplika serka sanitária ne’e, rendimentu mínimu liu ne’e $5 kada loron. Agora, loron ida tomak dalaruma laiha, semana ida mak foin ema ida-rua mak mai netik. Vida ne’e susar,” nia dehan hodi lakohi hateten sai rendimentu másimu ne’ebé nia hetan iha kada loron no kada fulan.

Tanba ne’e, nia husu atu Governu tau atensaun mós ba negosiante sira liu-liu loke dalan atu ema halo movimentu, nune’e restaurante sira iha Baucau bele hetan fali rendimentu hanesan baibain.

Alende ne’e, Agostinho mós husu komunidade sira hola parte iha kampaña vasinasaun atu kontribui ba redús surtu COVID-19 iha Timor-Leste liu-liu iha Baucau, nune’e bele normaliza hikas ekonomia.

Entertantu, Governu liuhosi konsellu ministru deside renova serka sanitária iha Munisípiu Baucau loron 7 tan hahu hosi loron 16 too 23 juñu 2021, tanba COVID-19 iha rejionál ne’e númeru aumenta beibeik.

Jornalista: Natalino Belo

Editór: Cancio Ximenes

iklan
iklan

Leave a Reply

iklan
error: Content is protected !!