Koordenadór Grupu Apoiu Sosiedade sivil (GASS), Filipe da Costa, observa direta produsaun fini ai-han lokál nutritivu ne'ebé membru grupu HAFUCU kuda. Imajen/Mídia GASS.

DILI, 20 juñu 2021 (TATOLI)—Governu liuhosi Gabinete Apoiu Sosiedade Sivíl (GASS), sesta (18/06) ne’e liuhosi serimónia asina akordu subvensaun fó apoiu orsamentu ho montante $10.000 ba grupu Haburas Futuru Comunidade (HAFUCU), hodi hadi’a nutrisaun no saúde labarik tinan lima mai kraik iha aldeia Triloka, suku Macadai, postu administrativu Baucau Vila, munisípiu Baucau.

Notísia Relevante: Filipe da Costa, Reprezentante Espesiál ba Seguransa Ai-han no Nutrisaun

Koordenadór Gabinete Apoiu Sosiedade Sivil (GASS), Filipe da Costa, hateten GASS lori subvensaun ba grupu HAFUCU relasiona ho rezolusaun Konsellu Ministru, iha loron 16 juñu hodi impoin mantein serka sanitaria iha Munisípiu Dili, atu sira hahú implementa sira-nia atividade kona-ba hadi’a nutrisaun ba labarik no inan isin-rua sira, nomós hadi’ak rendimentu uma-kain liuhosi produsaun no promove ai-han lokál. 

Filipe da Costa. Imajen/Egas Cristóvão

“Hosi orsamentu $10.000 ne’e GASC sei transfere uluk 40% ($4.000) hodi sira bele hala’o sira-nia atividade iha agrikultura hodi kuda ai-han nutritivu no fó han ai-han nutritivu ba labarik tinan-lima mai kraik no inan-isin rua kada fulan. Ha’u haree programa rua ne’e importante tebes tanba ohin loron, Timor-Leste kategória má nutrisaun aas tebes iha mundu. Nune’e, ita mobiliza sosiedade sivíl no grupu komunitária hodi apoiu programa Governu hodi hasa’e rendimentu uma-kain, kria kampu traballu, no redús má nutrisaun,” Filipe da Costa hateten liuhosi komunikadu imprensa ne’ebé Agência Tatoli, domingu ne’e.

Hafoin asina akordu subvensaun ne’e, Koordenadór GASC mós vizita kedas to’os membru grupu HAFUCU hamutuk 11 hodi observa direta produsaun ai-han lokál nutritivu ne’ebé membru sira kuda ona iha sira-nia toos.

Nia rekoñese katak grupu refere serbisu makaas kuda ai-han nutritivu hodi fó han gratuita ba labarik tinan lima mai kraik no inan isin-rua, ho sira-nia esforsu ne’e sira manan prémiu nutrisaun prezidente repúblika iha tinan 2017. 

Tanba ne’e, koordenadór ne’e enkoraja Grupu HAFUCU hodi implementa didi’ak orsamentu 40% ne’ebé sei transfere ba sira hodi benefísia ba komunidade iha aldeia Triloka.  

Governu asina akordu ho Grupu HAFUCU ne’e, hodi hala’o atividade iha área hanesan agrikultura, saúde no kooperativa liuhosi produsaun no promove ai-han lokál nutritivu ba labarik sira iha aldeia Triloka, suku Macadai, Postu Administrativu Baucau Villa, Munisípiu Baucau.

Entretantu Koordenadora Grupu HAFUCU, Maria Idalina da Costa Tilman, hateten orsamentu subvensaun ne’ebé sira hetan, sei utiliza hodi halo produsaun no promove ai-han lokál nutritivu ba komunidade no fó han ba labarik tinan lima mai kraik no programa ortikultura marungus ka marungi. 

“Ami-nia grupu iha tarjetu ida mak atu prodús no demonstra tein ai-han lokál nutritivu gratuita ba labarik no inan isin-rua sira hodi hadi’a sira-nia nutrisaun, ne’ebé ami hala’o dezde manan prémiu Nutrisaun Prezidente Repúblika iha 2017, hadi’a rendimentu uma-kain, no habarak fini marungi hodi fahe ba família agrikultór sira,” Koordenadora ne’e hateten bainhira simu Nota Entendimentu subvensaun públiku iha aldeia Triloka.

Tanba ne’e, nia hato’o agradeseimentu ba Governu ne’ebé fó ona konfiansa ba Grupu HAFUCU hodi kontinua hala’o programa fó ai-han nutritivu ba labarik sira tinan-lima mai kraik no inan isin-rua, nomós programa hadi’ak rendimentu uma-kain. 

Jornalista : Arminda Fonseca

Editór       : Cancio Ximenes

HAKEREK NO HATÁN

Please enter your comment!
Please enter your name here