Ministru Edukasaun, Juventude no Desportu (MEJD), Armindo Maia, vizita ESJ 01 Suai, sábadu (19/06/2021). Imajen Tatoli/Celestina Teles

COVALIMA, 19  juñu 2021 (TATOLI)-Ministru Edukasaun, Juventude no Desportu (MEJD), Armindo Maia, rekoñese kualidade eskola privadu-sira tanba rezultadu ezame nasionál kada tinan sempre hatudu valor exelente.

“Kada tinan rezultadu iha ezame nasionál ita sempre hili estudante valor di’ak liu na’in-10 iha eskola hotu iha territóriu nasionál. Ita haree kuaze 100% alunu-sira mai hosi eskola privadu maka domina. Tebes. ita presiza atu hadi’a eskola públiku sira-ne’e,” Ministru Armindo Maia,  hateten ba jornalista-sira iha bainhira vizita ba Eskola Sekundariu Jerál (ESJ) 01 Suai, Munisípiu Covalima, sábadu ne’e

Liuhosi vizita serbisu iha Munisípiu Covalima, Ministru Armindo Maia, promete atu tau iha planu ministériu nian kona-bá reabilitasaun eskola tékniku vokasionál ho eskola Sekundáriu Jerál 01 Suai atu bele sai hanesan referénsia ba eskola públiku-sira.

Nia mós informa MEJD sei prevee osan ba infraestrutura, biblioteka, laboratóriu no sei forma rekursu umanu atu bele eleva nivel kualidade ensinu públiku.

Vizita eskola ESTVOC-ESJ 01 Suai 

Ministériu Edukasaun Juventude no Desportu (MEJD), Armindo Maia,  hala’o vizita ba eskola Sekundáriu Tékniku Vokasionál (ESTVOC) no Eskola Sekundáriu Jerál (ESJ) 01 Suai hodi haree  direita kondisaun eskola

“Ha’u nia vizita ne’e atu haree kondisaun eskola no mudansa eskola sira ne’ebé mak durante ne’e la’o ona atu identifika poténsia eskola ne’ebé Governu investe hodi sai eskola ne’ebé exelente  no kualidade,” Armindo Maia esklarese.

Iha vizita ne’e Ministru Armindo Maia nota katak ESJ 01 Suai laiha duni mudansa signifikante. Tanba ne’e tenke haree ba rekursu umanu hodi bele fó atendimentu ba estudante sira nune’e bele dezenvolve sira nia kualidade.

Iha fatin hanesan  Diretór ESJ 01 Suai, Francelino Freitas Carvalho, hateten sira-nia parte orgullu tebes ho Ministru Armindo Maia nia vizita ne’e hodi bele motiva sira no bele haree sasidik (obstákulu) ho sasadik (dezafiu) sira ne’ebé eskola enfrenta hodi buka solusaun hamutuk.

Jornalista       : Celestina Teles 

Editór             : Cipriano Colo

HAKEREK NO HATÁN

Please enter your comment!
Please enter your name here