Prezidente Parlamentu Nasional, Aniceto Longuinhos Guterres Lopes. Imajen Tatoli/Antonio Goncalves.

DILI, 18 juñu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes hateten, semana oin deputadu sira sei halo debate ba pakote alterasaun lei eleitorál tolu iha jeneralidade hodi halo aprovasaun.

Notísia Relevante: Komisaun A aprova ona relatóriu-paresér ba alterasaun lei eleitorál tolu

Pakote lei eleitorál tolu ne’e kompostu hosi alterasaun datoluk ba lei númeru 5/2006, 28 dezembru, kona-ba órgaun administrasaun eleitorál, alterasaun dahuluk ba lei númeru 6/2016, 25 maiu, kona-ba lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba Prezidente Repúblika.

“Pakote lei eleitorál tolu ne’e ajenda ba segunda-feira kona-ba diskusaun no aprovasaun iha jeneralidade. Se Komisaun A no plenária aselera entaun antes fulan ida-ne’e, ami bele aprova iha finál global, nune’e haruka ba Prezidente Repúblika atu hetan promulgasaun,” Prezidente Parlamentu Nasionál informa ba jornalista sira, iha uma fukun, sesta ne’e.

Nia hatutan, pakote lei eleitorál tolu ne’e prioridade no proposta-alterasaun ne’e debate ho karáter urjénsia.

“Prioridade tuir mai mak lei enkuardamentu orsamentu no jestaun finanseira públika. Ami buka trata hotu, se la konsege antes 14 jullu ami tenke aprova hotu finál globál nune’e haruka ba Prezidente Repúblika,” nia dehan.

Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here