Diretór Jerál STAE, Acilino Manuel Branco. Imajen/Espesiál.

DILI, 18 juñu 2021 (TATOLI)—Ditretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten rezultadu levantamentu ba empreza Sentru Produsaun Alola Esperansa, Gráfika Nasionál no Empreza Nasionál ne’ebé tuir planu atu emprime buletin votu ne’e, sei iha prosesu nia laran.

Notísia Relevante: CNE-STAE halo levantamentu ba empreza gráfika atu emprime bulletin votu

“Tékniku sira-ne’ebé mak halo levantamentu ne’e, sira sei tuur hamutuk. Hosi STAE nian, ema na’in-haat (4) ne’ebé kontempla hosi diretór na’in-rua (2) no tékniku na’in rua. Hosi parte CNE mak Prezidente CNE ho nia Vise inklui ho Komisáriu no tékniku balun. Sira ida-idak observa tuir sira-nia esperiénsia. Tanba hotu-hotu okupadu ho atividade, entaun ita traxa hela planu para semana oin ita tuur hamutuk hodi ko’alia kona-ba vantajén no desvantanjén sira,” Diretór Jerál STAE ne’e informa ba Agéncia TATOLI, iha Novu Turizmu, Lecidere, Dili, sesta ne’e.

Bainhira iha ona rezultadu hosi levantamentu, nia dehan, parte STAE ho CNE sei hato’o ba parte relevante liu-liu ba Ministériu Administrasaun Estatál (MAE) hodi haree nia prosesu konitnuasaun.

Rekezitu ne’ebé mak STAE fó ba empreza sira mak empreza ida tenke iha mákina ho nia kualidade ne’ebé di’ak, tenke iha kapasidade prodús buletin votu ho kuantidade barak no koloridu, no tenke tuir tempu ne’ebé mak determinadu hosi kalendáriu ne’ebé estabelese ona.

Hosi vizita ne’ebé órgaun eleitorál rua hala’o ne’e, nia hateten, kondisaun emprime di’ak hotu no prenxe kritériu maibé iha empreza balun nia kondisaun di’ak liu seluk.

“Ita hatene, materiál ne’e sensitivu entaun presiza haree nia rekezitu tékniku. Tanba ho intensaun ida katak buletin votu ne’e tenke iha kualidade, nune’e ita-nia eleitór sira bele utiliza hodi ezerse ninia direitu,” nia hateten.

STAE ho CNE halo levantamentu ne’e, halo parte ba atividade preparsaun ba eleisaun prezidensiál 2022 nian, tanba STAE hakarak iha eleisaun ne’e labele akontese fallansu ruma tanba buletin votu ne’e materiál ne’ebé importante liu materiál seluk.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here