Primeiru-Ministru, Taur Matan Ruak, no eis Prezidente Repúblika, Kay Rala Xanana Gusmão. Imajen TATOLI/António Gonçalves

DILI, 18 juñu 2021 (TATOLI)Primeiru-Ministru (PM), Taur Matan Ruak, hato’o ksolok aniversáriu ba eis Líder Rezisténsia, Kay Rala Xanana Gusmão, ne’ebé halo tinan ba dala 75 iha loron 20 juñu.

Iha aniversáriu tinan ne’e, PM Taur dezeja vida naruk ba eis Prezidente Repúblika.

“Husu Avo (Xanana) tinan naruk nafatin to’o 150, tanba ha’u hakarak idade to’o 150 entaun hakarak Avo Nana mós to’o 150, maibé bainhira ami na’in-rua idade to’o 150, imi tenke prontu atura ami nai’in-rua,” PM Taur hato’o mensajen ne’e iha ninia Rezidénsia Ofisiál iha Farol, sesta ne’e.

Kay Rala Xanana Gusmão, moris iha loron 20 juñu 1946 iha postu administrativu Laleia, munisípiu Manatuto.

Nia iha alin mane ida no feton na’in-lima, nune’e hotu tiha ensinu primáriu no hahú fali ensinu sekundáriu misaun Katólika Nossa Senhora de Fátima, iha Dare, hafoin mai fali iha Díli. Hahú servisu sedu liu, hala’o funsaun fiskál iha obra aban bain-rua no lorokraik hanorin iha eskola xineza. Iha abríl 1974, hala’o servisu iha redasaun ‘Lian Timor nian’.

Hafoin hala’o tiha Revolusaun Kravu iha Portugal, iha loron 25 abríl 1974 no hetan oportunidade ba auto-determinasaun no independénsia, Kay Rala Xanana Gusmão, deside hamutuk hó Asosiasaun Sosiál Demokrata Timorense-ASDT, ne’ebé foin hahú an atu forma no iha tinan ida ne’e duni, transforma iha Frente Revolusionária Timor-Leste Independente (FRETILIN).

Hala’o servisu hanesan jornalista no fotógrafu, Kay Rala Xanana Gusmão, asume kargu nu’udar Diretór Adjuntu ba Departamentu Informasaun partidu.

Iha loron 07 dezembru 1975, hafoin hala’o tiha invazaun fronteirisa armada iha teritóriu Timor-Leste, Indonézia deside invade kapitál Díli.

Hafoin Prezidente FRETILIN, Nicolau Lobato mate tiha, iha dezembru 1978, hamutuk ho Membru Komité Sentrál barak FRETILIN nian, Kay Rala Xanana Gusmão, simu knaar hodi organiza hikas fali luta.

Iha marsu 1981, organiza Konferénsia Nasionál FRETILIN nian ba dala uluk, durante ne’e, foti nia nu’udar líder Rezisténsia no Komandante-Xefe FALENTIL nian (Forsa Armada Libertasaun Nasionál Timor-Leste). Iha marsu 1983, Kay Rala Xanana Gusmão, hatudu nia pragmatizmu, bainhira hahú hala’o negosiasaun formál ho Forsa Armada Indonézia nian (ABRI/TNI), hodi halo sesar-fogu, ne’ebé dura to’o agostu tinan nebá ne’e.

Kay Rala Xanana Gusmão, harii no dezenvolve Polítika Unidade Nasionál ne’ebé hatudu iha koperasaun ativa hó membru Igreja Katólika no ho autoridade tranzitória Timor-Leste, Kay Rala Xanana Gusmão aproveita fulan-lima sesar-fogu hodi dezenvolve rede organizada klandestina nasionál nian ba dala uluk, ne’eb’e ema hatene hanesan ‘Frente Klandestina’.

Iha tinan 1988 susesu ba inisiativa Unidade Nasionál lori Kay Rala Xanana Gusmão harí CNRM-Konsellu Nasionál Rezisténsia Maubere, hanesan espresaun komandu nasionál apartidáriu luta nian; CNRM ne’ebé tuir mai CNRT, Konsellu Nasionál Rezisténsia Timorense.

Tinan ida hafoin Masakre Santa Cruz, no hafoin hala’o tiha iha guerilla tinan 17 nia laran, ema kaptura Kay Rala Xanana Gusmão iha loron 20 novembru 1992 iha kapitál Díli.

Maski hetan elojiu iha nível internasionál, Kay Rala Xanana Gusmão sai nu’udar alvu hodi simu julgamentu hanesan sena ida no dadur iha prizaun ida ne’ebé destinadu ba krimunozu komún. Maibé, tamba presaun hosi komunidade internasionál, autoridade indonézia sira, obrigadu halo nia tranferénsia ba Prizaun Cipinang, rezervadu ba prezu polítiku sira.

Iha prizaun, Xanana Gusmão, dedika nia tempu hodi halo estratejia ba Rezisténsia, hodi estuda mos lian indonéziu, inglés no direitu. Nia mos halo pintura no hakerek poezia, hakiak nia talentu ida ne’ebé hatene tiha ona iha tinan 1975, bainhira nia manan Prémiu Timorense ba Poezia husi poema ‘Mauberíadas’z Nia pintura balu fa’an tiha ona, no proveitu husi pintura hirak ne’e, Xanana Gusmão oferese ba Rezisténsia. Iha tinan 1994, nia ensaiu polítiku balu, publika tiha ona iha livru ida, Timor-Leste – Povu ida, Pátria ida, Ed.Kolibri, Lisboa.

Iha abríl 1998, iha Konvensaun Nasionál Timorense iha diáspora, ne’ebé estabelese Konsellu Nasionál Rezisténsia Timorense (CNRT) nian, Xanana Gusmão reafirma tiha ona hó rekoñesimentu hanesan líder Rezisténsia Timorense no Prezidente CNRT.

Tuir mai iha presaun internasionál ne’ebé maka’as liu tan kona-ba libertasaun Xanana Gusmão no deklarasaun hosi Prezidente Indonézia, B.J. Habibie, hodi promete atu fó independénsia ba Timor-Leste, bainhira hala’o konsulta popular iha país ida-ne’e, rejeita planu autonomia ne’ebé hato’o husi Governu, Kay Rala Xanana Gusmão tranferidu ba Prizaun Cipinan iha loron 10 fevereiru 1999, hodi ba fali iha prizaun domisiliária iha Salemba, parte sentrál Jakarta nian.

Prosesu dezenvolvimentu polítiku timorense hala’o lalais los no rekoñesimentu internasionál jeneralizadu husi kualidade Xanana Gusmão nian hanesan estadista no líder, nu’udar razaun atu hetan vizita hosi ema barak ba nia uma prizaun, hosi parte Governu estranjeiru, inklui mos Sekretária Estadu EUA, Madaleine Albright, eis Prezidente EUA, Jimmy Carter, Ministru Negósiu Estranjeiru Austrália Alexander Downer no Ministru Negósiu Estranjeiru, Japaun Masahiko Komura.

Referendun patrosinadu husi ONU iha loron 30 agostu 1999, proposta ba autonomia ne’ebé hato’o husi Indonézia rejeitada ho modo esmagador, hatudu sinál katak tenki hakotu duni okupasaun indonézia iha Timor-Leste no hahú prosesu tranzisaun ne’ebé lidera husi ONU iha Timor-Leste. Ida-ne’e, hanesan aktu demokrátiku ba dala uluk, iha istória Timor-Leste nian.

Iha loron 07 setembru 1999, Kay Rala Xanana Gusmão, sai husi prizaun domisiliária. Iha agostu 2000, hala’o Kongresu Nasionál CNRT iha Díli ba dahuluk, hodi foti Kay Rala Xanana Gusmão nu’udar Prezidente CNRT/Kongresu Nasionál. Iha novembru 2000 to’o 2001, Kay Rala Xanana Gusmão sai hanesan Portavóz ba Konsellu Nasionál, órgaun lejislativu ida ne’ebé timor ona nian duni, iha Administrasaun Tranzitória Timor-Leste, kompostu hosi reprezentante partidu polítiku sira, sosiedade sivíl, grupu pós autonomia no krensa relijioza oin-oin.

CNRT/CN dizolvidu iha loron 09 juñu 2001. Hafoin hala’o dizolusaun CNRT/CN, Kay Rala Xananna Gusmão konsentra nia esforsu iha AVR-Asosiasaun Veteranu Rezisténsia, organizasaun ida-ne’ebé halo parte membru antigu sira hosi Frente Klandestina, atu hodi kria kondisaun ba sira nia partisipasaun kualifikada iha prosesu dezenvolvimentu país.

Iha loron 14 abríl 2002, Kay Rala Xanana Gusmão eleitu hanesan Prezidente Timor-Leste no simu pose hanesan Prezidente Repúblika Demokrátika Timor-Leste iha loron 20 maiu 2002 no asume knaar to’o finál mandatu iha maiu 2007.

Hafoin husik tiha Prezidénsia, Kay Rala Xanana Gusmão, eleitu hanesan Prezidente partidu polítiku (Kongresu Nasionál ba Rekonstrusaun Timor-Leste (CNRT, sigla portugés), ne’ebé forma iha abríl 2007. Iha fulan juñu nia laran, Kay Rala Xanana Gusmão, hala’o kampaña ba eleisaun lejislativa iha nasaun laran tomak. Iha loron 30 juñu hala’o eleisaun lejislativa, ne’ebé CNRT simu iha segundu númeru, boot liu iha votu no hodi forma kedas aliansa ida ho partidu polítiku tolu, PD (Partidu Demokrátiku) no Koligasaun ASDT-PSD, hosi aliansa ne’e hanaran Aliasa Maioria Parlamenta (AMP), hodi garante asentu iha Parlamentu Nasionál 37 hosi 65.

Iha loron 03 agostu 2007, Prezidente Repúblika, José Ramos Horta, konvida ofisialmente AMP atu forma Governu tuir mai.

Iha loron 08 agostu 2007, iha Palásiu Prezidensiál Lahane, Kay Rala Xanana Gusmão, simu pose IV Governu Konstitusionál, nu’udár Primeiru-Ministru Repúblika Demokrátika Timor-Leste. Mandatu ba Governu termina iha tinan 2012.

Loron 07 jullu 2012, iha eleisaun lejislativa, CNRT hetan votu sira boot liu, hodi garante asentu 30 husi asentu 65 iha Parlamentu Nasionál. CNRT forma koligasaun ho PD no Frente Mudansa, hodi asegura hamutuk asentu 40 ba Bloku Koligasaun hosi partidu tolu nian.

Partidu koligasaun hetan konvite atu forma Governu, hosi Prezidente Repúblika ne’ebé mós mak foin eleitu, Taur Matan Ruak no iha loron 08 agostu 2012, V Governu Konstitusionál simu pose, bainhira IV Governu Konstitusionál kompleta loloos ninia Governasaun tinan-lima, Kay Rala Xanana Gusmão simu pose nu’udar Primeiru-Ministru no Ministru Defeza no Seguransa, ba mandatu tinan-lima nian.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here