Prezu sira iha Prizaun Becora. Imajen/Dok.TATOLI

DILI, 18 juñu 2021 (TATOLI)—Janeiru to’o juñu, Tribunál Distritál Dili (TDD) fó liberdade kondisionál ba prizioneiru kondenadu hamutuk na’in 29, mai hosi estabelesimentu prizaun Becora no Gleno.

TDD fó liberdade kondisionál bazeia ba rejime ba ezekusaun penál, dekretu lei númeru 14/2014, 14 maiu  iha kapítulu XII, liberdade kondisionál, seksaun 1  rejime hodi fó liberdade kondisionál ne’ebé previstu iha artigu 119, kona-bá modalidade no artigu 122 kona-bá prosedimentu.

Notísia relevante:Dadur 25 iha Prizaun Becora re-íntegra ba sosiedade

“Tuir  prosesu atu hetan liberdade kondisionál, primeiru Tribunál  notifika uluk ba iha diretór prizionál ho diretór reinsersaun sosiál  ho kondenadu durante loron 90, atu bele submete dokumentu-sira no sei hato’o fila-fali ba Ministériu Púbiku (MP), atu fó pareser liga ho relatóriu ne’ebé iha karik iha posibilidade Tribunál  liu hosi juiz titulár ne’ebé ka’er prosesu halo audisaun hodi deside,” Juiz Administradór TDD, Afonso Carmona, hateten ba jornalista Agéncia Tatoli iha kna’ar fatin Mandarin, Dili, sesta ne’e.

Kritéria ba prizoneiru kondenadu atu hetan liberdade kondisionál maka tenke kumpre ona metade pena, no iha avaliasaun másimu bom mai hosi relatóriu avaliasaun hosi diretór prizionál, relatóriu reinsersaun sosiál, deklarasaun konsientimentu hosi kondenadu nia hakarak.

“Tanba ne’e, kondenadu  sira kumpre ona kritéria hodi hetan liberdade kondisionál hosi Tribunál,’’ nia subliña.

Afonso Carmona fó ezemplu katak, kondenadu ida antes ne’e hetan pena prizaun tinan lima no kumpre ona metade pena tinan rua ho balun, bainhira hetan liberdade kondisionál sei sai hosi prizaun hodi fila-fali hamutuk ho família.

Tuir lei, bainhira kondenadu ne’e iha liur labele komete tan krime seluk no bainhira komete mak sei tama fali prizaun, hodi kumpre hotu pena ne’ebé antes ne’e hetan.

Tuir dadus TDD hosi kondenadu 29, antes ne’e komete kazu hanesan ofensa korporais grave, omisídiu, violasaun seksuál, korrupsaun no maustrato.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here