Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 18 juñu 2021 (TATOLI)—Ministru Administrasaun Estatál (MAE), Miguel Perreira de Carvalho, hateten Governu kompromitidu atu aumenta rekursu finanseiru ba munisípiu sira iha territóriu nasionál.

Notísia Relevante: Governu hahú diskute divizaun administrativa territóriu no finanseiru munisípiu

“Governu sentrál ho kompromitidu atu aumenta rekursu finanseiru ba munisípiu sira hotu,” Miguel Perreira de Carvalho hateten iha nia diskursu, iha enkontru regulár entre MAE ho Prezidente Autoridade Munisipál (PAM) no Administradór Munisípiu (AM), iha Novo Turizmu, Lecidere, Dili, sesta ne’e.

Rekursu finanseiru ne’e, PAM no AM bele utiliza hodi aluga tratór ka ekipamentu hanesan eskavadór ruma bainhira iha kazu emerjénsia iha ida-idak ninia munisípiu hodi halo servisu no labele hein tan hosi Governu sentrál.

Iha nivél sentrál, nia fo konsellu ba membru Governu sira hotu atu utiliza PAM ho AM halo servisu iha munisipál ho di’ak tuir dekretu-lei Nú. 3/2016 hateten, fó atribuisaun no kontribuisaun barak ba munisípiu sira.

“Infelizmente sira menus rekursu umanu no kapasidade finanseira, maibé ita kompromitidu atu aumenta rekursu ne’ebe ezije ita hotu atu halo,” nia dehan.

Iha biban ne’e, nia husu ba PAM ho AM atu iha tinan oin tenke halo planu atendementu no labele hein de’it ideia mak ba, tanba PAM ho AM iha kompeténsia atu haree infraestrutura hanesan estrada rurál sira no tenke tau orsamentu tanba munisípiu mak reprezenta Governu sentrál.

Governante ne’e hatutan, orsamentu ba munisípiu sira iha tinan 2019-2020 hamutuk millaun $29, depois iha 2021 ne’e sa’e to’o millaun $57 no 2022 bele sa’e makaas liu maibé ezije halo planu didi’ak hodi halo atendementu nesesáriu ba munisípiu sira hotu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here