Koordenadór Sentru Komunitáriu no Sentru Quesadhip Ruak (CQR), Mardoqueu Soares. Imajen Tatoli/Nelia Fernandes.

DILI18 juñu 2021 (TATOLI)—Koordenadór Sentru Quesadhip Ruak (CQR), Mardoqueu Soares, hateten iha tinan ida-ne’e formandu joven no labarik sira-ne’ebé tuir formasaun iha fundasaun Sentru Quesadhip Ruak (CQR) hamutuk 354.

Notísia Relevante: Governu Austrália apoia biblioteka ba Sentru Quesadhip Ruak

“Iha tinan ne’e, ema sira-ne’ebé mai tuir formasaun iha ne’e hamutuk 354. Hosi númeru ne’e joven hamutuk na’in-294 no labarik na’in-60,” Mardoqueu Soares hateten ba Agência Tatoli, iha nia kna’ar fatin, Taibesi, Dili, sesta ne’e.

Formasaun ba formandu 354 ne’e hahú iha fulan-janeiru 2021, maibé tama iha fulan marsu númeru pozitivu COVID-19 aumenta no Governu implementa serka sanitária, entaun formasaun ne’e labele kontinua to’o ohin loron.

Koordenadór ne’e enkoraja formandu sira atu tuir vasina, no sei hein hela despaixu hosi Ministériu Edukasaun Juventuude no Desportu (MEJD) bainhira reativa fali ensinu aprendizajen mak sira mós sei hahú fali formasaun ne’e.

Iha 2021 ne’e, Sentru Quaesadhip Ruak ne’e fó formasaun iha área formasaun sira hanesan lian Inglés, Korea, Japaun no Komputadór, nomós área formasaun ba labarik sira mak hanesan hanesan Inglés, Matematika, Português, no Relijiaun ka Morál.

Fundasaun Sentru Quesadhip Ruak harii 2012 ne’ebé funda hosi Isabel da Costa Ferreira, maibé iha 2016 mak foin hahú halo formasaun ba ema kbiit laek sira ho gratuita. Faze dahuluk ema-ne’ebé mai rejista na’in-32 mak tuir kursu komputadór no hosi númeru ne’e 50% mak hetan ona servisu.

Iha 2018, sentru ne’e halo koordenasaun ho Embaixadór Korea, Lee Chin-Bum, hodi loke kursu lian Korea no konsege rejistu juventude 400, maibé tanba fatin ne’ebé limitadu entaun tenke liuhosi teste no simu de’it formandu 126.

“Hosi tinan 2016 to’o agora, ema ne’ebé mai tuir formasaun iha ne’e hamutuk 1000-resin. Juventude na’in-25 mak hetan ona servisu iha Hotel Golgota, Plan Internasionál, Polisia Nasionál Timor Leste (PNTL), instituisaun Governu no servisu iha Korea. Formandu ida prepara hela, iha tinan ne’e, sei halo estudu komparativu iha Japaun,” nia dehan.

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here