Motór hamutuk 26 ne’ebé PNTL halo apreensaun iha 2012 to’o agora para hela iha áredór Komandu Jerál PNTL, Caicoli-Dili. Imajen Tatoli/Eugénio Pereira.

DILI, 18 juñu 2021 (TATOLI)—Polísia Nasionál Timor-Leste (PNTL), liu hosi Diresaun Nasionál Tránzitu no Seguransa Rodoviária (DNTSR), halo apreensaun ba karreta rua ho motór 26 dezde tinan 2012, maibé to’o oras-ne’e na’in la kompleta dokumentu, hodi bele foti-sai transporte.

Tanba ne’e, DNTSR fó tempu fulan ida ba sidadaun-sira atu kompleta dokumentu motór ho karreta hirak-ne’e, nune’e bele foti ona.

Notísia relevante:PNTL halo apreensaun ba motorizada 200

Komandante DNTSR, Superintendente, João dos Reis Belo, hateten bainhira transporte na’in la ba kompleta dokumentu, PNTL sei husu autorizasaun hosi Ministériu Públiku (MP) atu entrega transporte hirak-ne’e ba Diresaun Nasionál Patrimóniu Estadu (DNPE), hodi halo leilaun ba públiku.

“Ami fó tempu fulan ida. Se sira la mai, ami sei koordena ho Ministériu Públiku atu entrega ba Patrimóniu Estadu hodi halo leilaun públiku,” João dos Reis Belo, hateten ba jornalista-sira iha Komandu Jerál PNTL, Caicoli, sesta ne’e.

Tuir observasaun Agência Tatoli, motór no karreta hirak ne’e para hela iha arredór Komandu PNTL, no balun kondisaun aat ona.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here