Jestór sub-rejiaun Pasabe, Anton Ulan. Imajen Tatoli/Abilio Elo Nini.

OÉ-CUSSE, 18 juñu 2021 (TATOLI)—Autoridade sub-rejiaun Pasabe enkoraja líder komunitária no komunidade koopera ho ekipa saúde no seguransa atu luta hamutuk kombate COVID-19, hodi labele halo transaksaun illegál iha fronteira.

“Ha’u-nia komunidade apoiu 100% autoridade RAEOA nia planu no programa saida de’it atu dezenvolve rai Oé-Cusse, liu-liu apoiu planu atu hadook-aan hosi COVID-19 ne’e ami prontu. Kona-bá prevensaun no kombate COVID-19, ami kontinua sensibiliza no enkoraja abitante sira atu labele halao transaksaun ilegál no lebele hakat liu fronteira ho dalan ilegál,’’ Jestór sub-rejiaun Pasabe, Anton Ulan, hateten ba Agência TATOLI, hafoin partisipa serimónia inagurasaun kuarentena, iha Pasabé, sesta ne’e

Bainhira abitante sira hakat liu fronteira, nia informa, abitante sira kontaktu kedas ba autoridade lokál atu koordena ho ekipa saúde no parte seguransa hodi toma medida no tau iha konsiderasaun.

“Hahú COVID-19 ne’e, ami aviza keda no fó hatene beibeik ba ita-nia komunidade katak atu labele halo movimentu iha ilegál iha fronteira,” nia dehan.

Entretantu Xefe aldeia Pasabe, suku Abani, Vicente Quefi hateten, nu’udár autoridade lokál no nu’udar sidadau baibain iha área rurál ne’e, sempre fiar no halo tuir informasauun kona-ba COVID-19 hosi Governu tanba iha área rurál susar asesu informasaun.

“Ami iha baze ne’e menus informasaun, entaun ami fiar ba nai-ulun sira. Ha’u hanesan líder lokál fó fiar tomak ba autoridade sira katak moras ne’e moras aat ida, ita labele rona no fiar ema mai bosok ita dehan COVID-19 bosok. Maibé saida mak Guvernu halo ne’e, tanba Governu hadomi nia povo no lakohi nia povo mate tanba moras ida-ne’e,” nia dehan.

Programa prioridade 5 ba Pasabe

Entretantu Prezidente Autoridade (PA) Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hateten autoridade RAEOA sei dezenvolve no fó prioridade programa lima (5) ba komunidade sub-rejiaun Pasabe mak hanesan bee-moos, estrada, saúde, edukasaun no eletrisidade.

“Ha’u husu de’it ba maluk sira iha sub-rejiaun Pasabe, só ita apoia malu tanba autoridade agora iha membru autoridade na’in-ualu (8) ho prezidente autoridade mesak atoni-oan de’it. Ami-nia objetivu ida de’it, servisu ba ema rihun 85 iha Oé-Cusse, iha loron sábadu no domingu kuandu persiza servisu tenke servisu tanba Estadu selu ita atu servisu. Ha’u ko’alia hanesan ne’e tanba RAEOA iha orsamentu, ita iha vontade atu servisu dezenvolve enklave ne’e,” nia dehan. .

Programa prioridade lima (5) ba sub-rejiaun Pasabe hahú ne’ebé sei fó benefísiu direta ba komunidade mak hanesan;

1.) Bee-moos, autoridade tenke rezolve ne’e primeru aleinde COVID-19 ne’e. Bee-moos ne’e nesesidade primeiru, autoridade iha projetu perfurasaun atu halo iha Pasabe. Tanba sub-rejionál tolu (3) halo ona hanesan sub-rejionál Oesilo, Nitibe no Pante Makasar, só Pasabe mak sedauk halo maibé tinan ida-ne’e hahú ona.

2.) Estrada, iha suku Malelat hahú ona parese fulan oin estrada rurál manutensaun ba suku Malelat nian kontinua tun ba aldeia Haemnanu mai Pasabe Vila tenke halo, depois iha projetu estrada urbana tinan ida-ne’e duni.

3.) Saúde, hahú dadauk ona tanba agora dadaun sei uza hela sentru saúde no postu saúde sira.

4.) Edukasaun, iha aldeia Haemnanu, suku Abani ne’e atu harii Eskola Bázika Central (EBC) nomós iha suku Malelat. Sekretáriu rejionál ko’alia ona ho padre paróko Pasabé atu harii sentru eskola ida iha ne’e, entaun autoridade sei apoia.

5.) Eletrisdade, kuaze atu ramata tanba atinji ona 95%. Tinan ida-ne’e, autoridade sei kompleta ba 100%.

Notísia Relevante: PA RAEOA inaugura kuarentena iha Pasabe

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here