Admistradór postu Baucau villa, munisípiu Baucau, Francisco Ximenes. Imajen TATOLI/Natalino Belo

BAUCAU, 18 juñu 2021 (TATOLI)–Administradór postu Baucau villa, munisípiu Baucau, Francisco Ximenes, hateten, prosesu dezenvolvementu infraestrutura bázika iha suku 11 postu ne’e mai hosi Programa Nasionál Dezenvolvementu Suku (PNDS) no Planu Dezenvolvementu Intergradu Munisipál (PDIM), tanba ne’e autoridade sira konsensu halo dezenvolvimentu ho mekanizmu rotasaun.

“Kona-ba suku hotu kuaze hanesan, tamba ita ko’alia kona-ba kategoria dezenvolvementu, liuhosi prioridade PDIM Baucau ami halo konsensu liuhosi mekanizmu rotasaun, nune’e sira bele hetan hotu benefísiu no la hamosu dezentendimentu entre suku,” Francisco Ximenes hateten iha nini knaar fatin, sesta ne’e.

Autoridade postu ne’e dehan, liuhosi PDIM, daudaun ne’e realiza kanalizasaun bee-mos ba aldeia Ana-ulu, suku Bahu no suku Kaibada sei konstrui mini irrigasaun, suku Buibau sei konstrui uma ba profesór, suku seisal sei konstrui postu saúde no suku Gariuai sei kanaliza bee-mos.

Antes atu implementa PDIM, planu mai hosi suku ne’ebé aprezenta projetu tolu ba asembleia postu no ikus mai hamosu prioridade projetu hanesan iha setór edukasaun, saúde, agrikultura, bee-mos no estrada, ne’ebé mak submete ona ba iha nível munisípiu no sei relata ba nasionál.

Aleinde ne’e, PNDS rasik daudaun ne’e realiza programa regulár, hanesan Uma Kbiit Laek  inklui konstrusaun no reabilitasaun sede suku.

Notísia relevante: PNDS kontinua implementa programa regulár iha Baucau

Administradór lokál hatutan, bazeia ba akordu Governu Portugal no Timor-Leste, iha tempu badak kompañia Água de Portugês (AdP) sei konstrui bee-mos iha aldeia Darasula hodi distrubui ba populasaun iha postu Baucau villa hotu.

“Karik ida-ne’e mak la’o, Baucau pelu menus hetan susesu netik ba bee-mos,” nia akresenta.

Postu Baucau villa kompostu hosi suku 11 hanesan Bahu, Bucoli, Buibau, Buruma, Kaibada, Gariuai, Samalari, Seical, Tirilolo, Triloka no Uailili, ho totál populasaun hamutuk 56.148.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here