Admistradór postu Baucau villa, munisípiu Baucau, Francisco Ximenes. Imajen TATOLI/Natalino Belo

BAUCAU, 18 juñu 2021 (TATOLI)–Administradór postu Baucau villa, munisípiu Baucau, Francisco Ximenes, husu komunidade sira atu partisipa másimu iha kampaña vasinasaun AstraZeneca.

“Hakarak fó mensajen ba inan-aman sira, hahú hosi idade 18 ba leten atu koopera ho ita-nia Ministériu saúde (MS), ba vasinasaun ne’ebé ema barak ko’alia dehan ladi’ak no bele fó impaktu, maibé própiu ha’u rasik tuir ona vasina no laiha buat ida,” Admistradór dehan ba Agência TATOLI, iha ninia knaar fatin, sesta ne’e.

Francisco rasik idade 61, hafoin ramata vasina nia parte sente laiha efeitu ba saúde, nune’e husu atu komunidade sira kolabora ho MS atu tuir vasina hodi iha imunidade luta kontra COVID-19 iha Timor-Leste.

“Ha’u-nia laiha efeitu, barak liu mak ko’alia hanesan ne’e, maibé pesoalmente ami sente vasina ne’e laiha impaktu ba ita, tamba bainhira médiku sira fó vasina própiu, ha’u la sente buat ida,” nia akresenta.

Maski nune’e, tuir Administradór, saúde iha liman rasik, entaun filafali ba ema idaidak ninia konsiénsia, maibé di’ak liu tuir saida mak Governu trasa, planu no programa.

Nune’e, nia husu atu komunidade sira labele fiar rumór ne’ebé lansa iha rede sosiál, katak vasina AstraZeneca la seguru, maibé importante mak hanesan ema umanu ne’ebé moris iha idaidak ninia fatin, postu no munisípiu nafatin tuir programa Governu nian atubele hetan vasina atu livre hosi COVID-19 ne’ebé agora daudaun ema hotu sente no sai prekupasaun iha mundu no Timór.

Antes ne’e, munisípiu Baucau rasik hahú lansa vasina doze daruak iha loron segunda (14/06), hanesan meiu prevensaun hodi kombate surtu COVID-19 iha rejionál ne’e.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here