Konsellu Imprensa hamutuk ho komunidade jornalista no estudante universitáriu, ohin hala’o marsa hosi Rotunda Francisco Xavier do Amaral to’o terminál Bekora hodi komemora loron mundiál liberdade imprensa. Imajen António Gonçalves

DILI, 17 juñu 2021 (TATOLI)—Tribunál Distritál Dili (TDD), iha ona planu atu fó formasaun ba jornalista hosi média nasionál-sira ne’ebé destakadu hodi halo kobertura ba asuntu justisa, liu-liu iha Tribunál.

“Ita hanoin ona atu halo formasaun ba jornalista-sira oinsá hakerek notísia uza termu jurídiku,” Juiz Administradór TDD, Afonso Carmona, hateten ba jornalista Agência Tatoli, iha kna’ar-fatin Mandarin, kinta ne’e.

Notísia relevante:TDD sei disemina lei penál ba komunidade

Afonso Carmona konsidera papél jornalista importante tebes hodi fó-sai informasaun ba públiku, liu-liu prosesu julgamentu ba kazu-sira ho meiu divulgasaun lei-sira ba sidadaun, nune’e bele hatene liu tan no evita halo krime.

Juiz administradór ne’e observa mós katak, notísia-sira ne’ebé durante ne’e jornalista-sira fó-sai, liu-liu kona-bá kazu-sira di’ak ona, maibé terminolojia jurídika balun presiza hadi’a, tanba ne’e TTD hola inisiativa ida-ne’e.

Afonso Carmona mós apresia ho serbisu jornalista Timoroan sira ne’ebé destaka hodi halo kobertura iha Tribunál, no husu atu kontinua apriende barak liu tan, hodi sai profisionál liu-tán iha serbi sidadaun liu hosi informasaun.

Jornalista hosi média Suara Timor Lorosa’e (STL), Terezinha de Deus, ne’ebé destakada iha área justisa, kontente ho inisiativa hosi parte TDD, tanba bele fasilita liu-tán hodi introdús termu jurídiku iha hakerek notísia.

“Formasaun ne’ebé sei realiza importante tebes tanba bele hetan esplikasaun liu tán kona-bá termu jurídiku-sira. Hein katak, bele realiza duni planu ne’e,” jornalista ne’e hateten.

Hanesan jornalista destakada iha Tribunál, agradese ba juiz administradór TDD ne’ebé durante ne’e sempre kolabora hodi fasilita informasaun liga ba serbisu Tribunál-nian.

Média nasionál-sira ne’ebé durante ne’e destaka jornalista hodi halo kobertura iha Tribunál mak hanesan Agência Tatoli, Grupu Média Nasionál Televizaun (GMNTV), jornál Timor Post, Suara Timor Lorosa’e (STL), Jornál Indepedente no Naunil.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here