Natar iha Uatulari, Viqueque. Imajen Tatoli/Vitorino Lopes da Costa

VIQUQUE, 17 juñu 2021 (TATOLI)-Programa Sesta Bázika ne’ebé Governu implementa motiva tebes agrikultór-sira hodi halo natar no prodús kuantidade hare barak liután.

Notísia Relevante : Cesta Bázika motiva agrikultór-sira

Xefe Suku Macadique, Postu Administrativu Uatulari, Afonso dos Reis, informa agrikultór-sira badinas halai natar  tanba sira hatene katak rezultadu hare folin di’ak tanba Governu prontu sosa atu sustenta ba programa Cesta Bázika.

“Iha ha’u-nia Suku Macadique,  agrikultór-sira badinas ona halo natar. Uluk programa ne’e seidauk iha, ha’u haree joven sira  halimar de’it, maibé agora hotu-hotu halo natar tanba hare folin di’ak, foos lokál mós folin di’ak,” Afonso dos Reis informa ba Agênsia Tatoli iha Administrasaun Munisípiu Viqueque, kuarta lokraik (16/06).

Afonso hatutan, foin lalais ne’e Suku Macadique mós fornese foos-lokal  tonelada  200 ba programa Sesta Bázika liuhosi  Sentru Lojístika Nasionál (CLN) no kompañia  Jacinto Group mós tuun direta ba sosa foos-lokal hosi agrikultór-sira.

“Ha’u rasik mak halibur populasaun sira nian foos-lokál transfere ba CLN no kompañia Jacinto Group. Parte rua ne’e sosa foos-lokál kuaze tonelada  200 hodi distribui fila-fali ba munisípiu seluk liuhosi programa Cesta Bázika,” Afonso dos Reis hateten.

Ba oin, nia husu ba Governu atu kontinua motiva agrikultór-sira halai natar no fila ba to’os hodi prodús ai-han lokál.

“Oinsá atu motiva agrikultór-sira, Governu tenke kria kondisoens no fasilita merkadu ho folin di’ak ba produsaun agríkola,” Afonso dos Reis hateten.

Jornalista : Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here