Diretór Institutu Nasionál Linguistíka (INL), Benjamin de Araújo Cortereal. Imajen Tatoli/Nelia Fernandes.

DILI, 17 juñu 2021 (TATOLI)—Diretór Institutu Nasionál Linguistíka (INL), Benjamin de Araujo Cortereal, hateten durante pandemia COVID-19 no Serka sanitária ne’e INL halo ona legalizasaun ba tradusaun dokumentu no diploma sira.

Notísia Relevante: COVID-19, INL labele realiza formasaun iha munisípiu

“Iha tempu pandemia ami bele hala’o de’it kna’ar ne’ebé hanesan burukrátiku, ne’ebé la depende ba buat barak. Maibé depende de’it ba ami katak INL fó sai rekoñesimentu ka legalizasaun ba tradusaun dokumentu sira,” Diretór INL ne’e hateten ba Agência Tatoli, iha nia kna’ar fatin, Kampus Sentral Universidade Nasional Timor Lorosa’e (UNTL), Liceu, Dili, kinta ne’e.

Bainhira ema rai-li’ur presiza hala’o sira-nia negósiu ruma, sira presiza aprezenta dokumentu atu rejistu iha SERVE ne’e tenke hakerek ho lian portugés no tetun, entaun sira husu ba INL nia tulun tenke tradús no verifika ka legaliza tradusan ne’e loos ka lae.

Ida seluk, ba joven sira ne’ebé eskola iha rai-li’ur ne’ebé sira-nia diploma hakerek ho lian Maláiu ka Portugés mak atu ba eskola iha nasaun sira-ne’ebé ko’alia lian Inglés, entaun parte INL tenke tradús hosi lian Maláiu no portugés ne’e ba lian Inglés.

“Iha kazu balun, médiku timor-oan sira-ne’ebé ba eskola iha Cuba, mai ho diploma hakerek lian España nian, ami tenke tradús ba Português ka ba Inglés. Ami iha difikuldade uituan maibé ami konsege rezolve. Ami bele dehan katak, ami tradús hosi tradusaun ida hosi orijinál ba lian ida seluk ne’e, ami labele responsabiliza no Governu tenke iha meiu verifika fali,” nia dehan.

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here