Sekretáriu Estadu Komunikasaun Sosiál, Merício Juvinal dos Reis ‘Akara’, akompaña ho entidade relevante, lansa kompetisaun ba Youtuber Timor-Leste, iha salaun PCM, Palásiu Governu, kinta (17/06). Imajen TATOLI/Natalino Costa

DILI, 17 juñu 2021 (TATOLI)–Sekretaria Estadu Komunikasaun Sosiál (SEKOMS) halo lansamentu kompetisaun ‘content creator’ YouTube (Youtuber Timor-Leste), hodi  fó oportunidade ba joven sira prodús vídio promosaun.

Tópiku produsaun vídio foku ba promosaun kombate HOAX, promove internet saudável, kampaña vasina, turizmu, arte no kultura.

Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, liuhosi nia intervensaun iha seremónia lansamentu kompetisaun, hateten, objetivu atividade ne’e atu fó oportunidade ba joven sira hatudu kreatividade ne’ebé iha uza plataforma online.

Governante ne’e nota katak, durante ne’e ema sempre kondena joven mak sai autór ba konflitu iha sosiedade, maibé nia konsidera persepsaun ne’e la loos.

“Ha’u hanoin tempu ona joven sira buka dezenvolve-an liuhosi plataforma dijitál ne’ebé ita iha daudaun hodi halo atividade pozitivu, tanba ne’e kria kompetisaun atu tulun, fó oportunidade no enkoraja joven sira atu hatudu abilidade no kreatividade liuhosi plaforma dijitál,” Sekretáriu Estadu dehan iha salaun Prezidénsia Konsellu Ministru, Palásiu Governu, kinta ne’e

Nune’e, nia husu ba joven sira aproveita didi’ak oportunidade hodi lori vantajen di’ak ba an rasik no nasaun.

“Atu sai Youtuber, ita la’ós hanoin buka lukru de’it, maibé presiza promove no explora potensialidade ita-nia rai hodi hatudu ba mundu katak biar Timor-Leste kiik, maibé hanesan nasaun potensiál,” nia subliña.

Iha fatin hanesan, Prezidente Conselho de Imprensa (CI), Virgílio Guterres, hateten, mundu dijitál ezije ema atu aprende no adapta uza plataforma rede sosiál.

“Entaun ho kapasidade uza ekipamentu sira-ne’e maka Sekretaria Estadu Komunikasaun Sosiál kria kompetisaun ba Youtuber, nu’udár meiu ida hosi Governu atu enkoraja, insentiva no fó oportunidade ba joven partisipa ativu liután uza plataforma rede sosiál iha era dijitál ida-ne’e,” nia tenik.

Biban ne’e, Virgílio Guterres kongratula SEKOMS ba inisiativa ida-ne’e, maibé husu atu halo produsaun ho kontiúdu pozitivu, ne’ebé sai parte ida atu eduka sosiadade.

Nune’e mós, Prezidente Agência TATOLI, I.P, Manuel Pinto, apresia kompetisaun ne’ebé envolve maioria joven.

“Ha’u apresia tanba ha’u hetan mensajen rua, katak hahú implemeta literasia dijitál no hahú fó valorizasaun ba  joven mileniál sira,” nia subliña.

Koordenadór Youtuber Timor-Leste, Abrão Monteiro, haksolok ho inisiativa SEKOMS ne’ebé bele fó oportunidade ba joven sira hatudu kreatividade.

“Liuhosi meiu plataforma dijitál ita bele buka osan, maski ita iha difikuldade maibé ita bele halo,” nia tenik.

Prémiu ba manan-na’in sira sei fahe ba kategoria lima hanesan klasifikasaun dahuluk hetan osan $1.000, daruak $750, terseiru $500, dahaat $400 no dalima $350.

Komisaun organizadora simu submisaun ba produsaun vídeo hosi loron 27 juñu to’o 09 jullu.

Produsaun produtu kompetisaun ne’e bele manda via karta eletrónika, email ofisiál SEKOMS mediagabinetesecoms@gmail.com, ho formatu LINK GOOGLE DRIVE.

Rezultadu kompetisaun sei anunsia iha loron 18 jullu 2021 no seremónia entrega prémiu ba manan-na’in sira sei realiza iha loron 20 jullu 2021.

Jornalista : Natalino Costa

Editora     : Julia Chatarina

2 KOMENTÁRIU

  1. Aproveita okasiun ida nee atu komentario konaba kombate imfo hoax iha Timor leste ?

    Ser Estudante nebe matenek no dixiplina tenki kontrola aan ka linguagem ruma antes publika informasaun ,atu kombate hoax iha Timor-Leste ita presisa halo peskisa ba imforsaun ida nebe kredivel no klaru, Labele pasa imforsaun ida nebe la kredivel no la klaru wainhira kombate hoax ita presisa analisa ba situasaun real neebe akontese ou ita bele ba halo intrvista direita iha tereno ka iha fatin nebe publika informasaun atu ita Labele pass informasaun nebe la klaru .

    Mai ita hamutuk kombate hoax iha Timor-Leste , atu garante imforsaun ida nebe kredivel no klaru povo Timor-Leste.

Leave a Reply to Justo da Costa alves Cancel reply

Please enter your comment!
Please enter your name here