Sekretáriu Estadu Juventude no Desportu, Abrão Saldanha. Imajen TATOLI/Egas Cristovão.

DILI, 17 juñu 2021 (TATOLI) – Sekretáriu Estadu Juventude no Desportu (SEJD), Abrão Saldanha, informa  SEJD nia ekipa ida halo hela levantamentu dadus ba federasaun desportu hotu atu hatene loloos kona-bá ezisténsia federasaun nian.

“Levantamentu ne’e buka hatene informasaun kona-bá atleta hira mak  federasaun sira idaidak iha, treinadór hira mak sira iha, aspetu organizasaun nian oinsá, sira iha asembleia ka lae, komité disiplinár iha ka lae, komité fiskál iha ka lae atu tau matan ba sira nia osan, sira-nia afiliasaun ho ho internasionál ne’e oinsá no seluk tan,” Abrão  Saldanha hateten ba Agência Tatoli iha edifísiu SEJD, Dili, kinta ne’e.

Nia dehan, bainhira federasaun hotu prienxe ona saida mak SEJD husu, maka SEJD sei halo planu hodi halo investimentu.

Atividade ne’e sei sai mós hanesan baze  ba fiskalizasaun Komisaun Nasionál Desportu (KND) atu fó utilidade públika desportiva.

“Federasaun ida ne’ebé atu hetan utilidade públika tenke prienxe rekizitu sira hanesan temi ona nune’e fasil liu atu dezenvolve setór desportu,” Abrão Saldanha hateten.

Daudauk ne’e federasaun hamutuk 21 mak partisipa ona sensibilizasaun ne’e no total federasaun ne’ebé rejistu besik 30.

Jornalista       : Hortencio Sanchez

Editór             : Francisco Simões