Membru Polísia Nasionál Timor Leste (PNTL), liu hosi Unidade Tránzitu, hala’o pasa revista iha área estádiu munisipál Dili, no kontinua halo sosializasaun regra serka sanitária ba komunidade, segunda (17/05/21). Imajen Tatoli/António Gonçalves.

DILI, 17 juñu 2021 (TATOLI)—Komandu Jerál Polísia Nasionál Timor-Leste (PNTL), sei koordena ho Departamentu Nasionál Tránzitu no Seguransa Rodoviária (DNTSR), atu moderniza kuadru avizu hodi publika informasaun loro-loron kona-bá dadus asidente no insidente iha kapitál Dili.

Portavóz Komandu Jerál PNTL, Superintendente Xefe, Arnaldo de Araújo rekoñese kuadru avizu manuál ne’ebé PNTL monta iha Dili laran, uza de’it ai no trikples hanesan iha área kruzamentu Palásiu Governu, arredór Komandu Jerál PNTL, Caicoli, Comoro no Becora ne’ebé komesa aat no lahuk hotu ona.

Notísia relevante:Semana kotuk, PNTL rejista insidente 21 no asidente neen

Komandu Jerál PNTL deskute ona asuntu ne’e atu moderniza kuadru avizu hosi sistema manuál ba sistema dijitál, utiliza LCD-LED ka out door hodi fasilita informasaun klaru ba públiku.

“Ita hanoin ona atu moderniza kuadru avizu iha Dili laran ho modelu dijitál LCD-LED, hanesan kuadru ida ne’ebé modernu ona atu fasilita públiku bele asesu informasaun ho di’ak,” Arnaldo de Araújo hateten ba jornalista-sira iha Komandu Jerál PNTL, Caicoli, kinta ne’e.

PNTL konsidera kuadru avizu ne’e importante hodi fó-sai dadus númeru asidente no isidente atu públiku bele konsumu informasaun hodi prevene an bainhira uza transporte iha Dili tenki kontrola velosidade, nune’e evita asidente tráfegu ne’ebé bele halakon ema nia-vida.

Antes ne’e, Komandante DNTSR, Superintendente, João Belo hateten atu moderniza kuadru avizu hosi sistema manuál ba eletrónika, presiza aprezenta mós orsamentu ba Komandu PNTL, hodi tau iha planu no programa.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here