Ministru Asuntu Parlamentár no Komunikasaun Sosiál (MAPKOMS), Francisco Jerónimo. Imajen TATOLI/Egas Cristóvão

MANATUTO, 17 juñu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten proposta ba faze daruak kona-bá projetu sistema transmisaun televizaun dijitál terestre iha Timor-Leste (TL), haruka ona ba Embaixada Xina no prosesu la’o hela.

“Ita hein bainhira Governu Xina aprova prosposta ne’e mak ita halo implementasaun,” Francisco Jerónimo, hateten ba Tatoli iha administrasaun postu administrativu Laleia, munsisípiu Manatuto, kinta ne’e.

Notísia relevante:Projetu Dijitalizasaun RTTL, EP Atinje ona Pursentu 90

Konteúdu hosi proposta ne’e, husu ba Governu Xina atu apoia iha área dizitalizasaun faze daruak tanba Governu TL prepara ona torre.

Orsamentu ne’ebé Governu mensiona iha proposta ne’e hamutuk millaun $18, maibé governante ne’e dehan, depende ba desizaun hosi Xina, tanba orsamentu ne’e Governu Xinéz-rasik mak prevee.

“Osan ne’e sira-nian, maibé sira hatama ba iha materiál ne’ebé lori mai hodi halo montázen ba torre ne’ebé ita prepara iha segunda faze no seluk ne’e Governu Xina mak prepara,’’ Governante ne’e esplika.

Primeiru-Ministru (PM), Taur Matan Ruak, akompaña hosi MAPKOMS, Francisco Jerónimo no Embaixadór Xina iha Timor-Leste, Xiao Jian Guo, ofisialmente lansa sistema dijitalizasaun Rádiu Televizaun Timor-Leste, Empreza Públika (RTTL,E.P) iha suku Guiço, postu administrativu Maubara, munisípiu Liquiçá, iha tersa (16/02/21).

Projetu muda sistema RTTL hosi analóg ba dijitál iha faze dahuluk kobre de’it Dili, Liquiçá no Aileu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here