Kondisaun estrada atu asesu ba aldeia Holbese. Imajen Tatoli/Sérgio da Cruz.

BOBONARO, 17 juñu 2021 (TATOLI)—Populasaun hamutuk 225 iha aldeia Holbese, suku Leber, postu administrativu Bobonaro, munisípiu Bobonaro, seidauk asesu ba estrada, no bainhira atu ba vila tenke la’o iha foho-lolon ho kilómetru tolu.

“Populasaun iha aldeia tomak seidauk asesu ba estrada desde tempu Indonézia to’o agora,” Xefe suku Leber, Joanico da Silva  hateten ba jornalista Agência Tatoli iha edifísiu administrasaun munisipál Bobonaro, kinta ne’e.

Notísia relevante:Governu hahú konstrui uma kbiit laek iha Bobonaro

Autoridade lokál ne’e preokupa tanba durante ne’e populasaun susar atu lori produtu lokál ba merkadu, no baibain tenke la’o ain hosi aldeia mai suku Leber-vila, hafoin bele lori produtu mai merkadu Maliana no Bobonaro.

“Komunidade lori sira-nia produtu ba merkadu la’o ain to’o kilómetru tolu mak sa’e karreta ka motór, tanba dalan laiha, komunidade la’o liu hosi foho leet no rai lolon de’it,” nia esplika.

Maski aldeia ne’e izoladu, maibé populasaun iha produtu lokál rasik hanesan, ai-farina, fehuk, talas, kumbili, repollu, fehuk roupa, koto, brinjela no seluk tan.

Tanba ne’e, Joanico da Silva husu ba Governu liu hosi Ministériu Obra Públika (MOP), atu bele loke estrada ba aldeia ne’e, nune’e bele fasilita movimentu populasaun.

Suku Leber iha aldeia haat hanesan, Leber Tas, Holsa Tas, Mabeliz no ida ne’ebé izoladu liu mak hanesan Holbese.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here