Negosiante Maria Estela Parada. Imajen Tatoli/Vitorino Lopes da Costa

VIQUEQUE, 17 juñu 2021 (TATOLI)- Negosiante Maria Estela Parada, ne’ebé halo atividade negósiu iha Merkadu Viqueque, preokupa tanba durante aplikasaun serka sanitária iha Viqueque halo sasán ka produtu lokál ne’ebé nia fa’an iha merkadu la folin.

Produtu lokál. Imajen Tatoli/Vitorino Lopes da Costa

“Durante implementasaun Estadu Emerjénsia no serka sanitária halo ami triste tebes, tanba ami la hetan rendimentu no ami nia sasán hanesan produtu lokál  ne’ebé fa’an iha merkadu la folin,” Maria Estela Parada haktuir ba Agência Tatoli iha merkadu Viqueque Vila, kinta ne’e.

Maria hatutan, produtu ne’ebé fa’an nee sosa tutan husi povu agrikultór balun hosi Baucau ho kustu $60.00 seidauk sura ho kustu transporte, maibé ema la mai sosa durante serka sanitária.

“Produtu sira ne’e ami sosa iha fronteira Baucau no Viqueque lokaliza iha Lariguto. Mas to’o tiha mai Viqueque, ema la sosa. Trieste tebes,” Maria Estela Parada hateten.

Baibain, nia hateten, ema sempre sosa produtu lokál ne’ebé nia fa’an, maibé ikus-ikus ne’e ema ba sosa $1.00 to’o $2.00  kada loron ne’e sorte boot liu ona.

“Ha’u ko’alia loloos katak  ema iha munisípiu seluk bainhira produtu la folin, ema fó sai iha mídia beibeik, maibé iha Munisipiu Viqueque  ema la foti ami-nia preokupasaun sira ne’e públika iha mídia  tanba laiha jornalista ida maka iha Viqueque hodi publika netik ami nia susar sira-ne’e,” negosiante Maria Estela Parada (60) hateten ho espresaun triste.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here