Ministru Asuntu Parlamentár no Komunikasaun Sosiál (MAPKOMS), Francisco Jerónimo, hala’o lansamentu vasina AstraZeneca doze daruak ba liña frente no doze dahuluk ba idozu ho komorbilidade-sira iha postu administrativu Laleia, kinta (17/06/21). Imajen Tatoli/Felicidade Ximenes.

MANATUTO, 17 juñu 2021 (TATOLI)—Durante fulan maiu, sentru saúde Laleia, munisípiu Manatuto, rejista pasiente ho moras Infesaun Respiratória Aguda (IRA sígla portugés), hamutuk 25 hanesan moras ne’ebé aas liu kompara ho diareia no sira seluk.

“IRA rejistadu aas tanba komunidade Laleia maioria agrikultór no sira ba serbisu sempre hasoru  rai-rahun,  tahu, bee foer hodi provoka moras  ida-ne’e,’’ Xefe sentru saúde Laleia, José da Costa hateten ba jornalista Agência Tatoli, iha Laleia, kinta ne’e.

Notísia relevante:MAPKOMS lansa vasina doze daruak iha Laleia

Dadus fulan abríl mós hatudu katak, IRA mak rejistadu aas liu hamutuk 50, maibé konsege redús tanba ho situasuan COVID-19 komunidade konsiensializadu hotu-hotu uza máskara no fase liman ho sabaun.

Kona-bá medikamentu, sentru saúde Laleia sufisiente hela, tanba liña koordenasaun diak ho Serbisu Saúde Munisípiu Manatuto, hodi fornese bainhira estoke menus.

Oras-ne’e daudaun, pesoál saúde iha sentru saúde Laleia hamutuk 31, inklui pesoál limpeza, seguransa ho motorista.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here