Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 17 juñu 2021 (TATOLI)Governu liuhosi Ministériu Administrasaun Estatál (MAE) planeia atu halo lansamentu fatuk dahuluk ba ‘Uma Kbiit iha munisípiu Viqueque no munisípiu seluk tan atubele hahú konstrusaun.

Ministru Administrasaun Estatál, Miguel Pereira de Carvalho, hateten progresu konstrusaun ba uma sira la’o di’ak, liuhosi prosesu identifikasaun benefísiariu no konstrusaun.

“Daudaun ne’e hahú konstrui ona Uma Kbiit Laek iha munisípiu Liquiçá, Ermera, no Bobonaro. Semana ne’e, ami sei ba halo lansamentu konstrusaun iha Viqueque no ba munisípiu seluk ne’ebé seidauk lansa, atu hahú konstrusaun,” Ministru Miguel hateten ba Agência TATOLI, iha resintu Ministériu Finansa, Aitarak-laran, kinta ne’e.

Notísia relevante: Governu hahú ona konstrui “Uma Kbiit Laek” 1.254 iha territóriu nasionál

Benefisiáriu ba Uma Kbiit Laek iha territóriu nasionál hamutuk 1.245, ne’ebé la inklui Rejiaun Administrativu Espesiál Oé-cusse no Ambeno (RAEOA).

Hosi dadus ne’e, iha munisípiu Aileu sei konstrui uma 99, Ainaro 62, Baucau 177, Bobonaro 150, Covalima 90, Dili 24 de’it ba postu administrativu Ataúro no Metinaro, Ermera 156, Lautém 102, Liquiçá 69, Manatuto 93, Manufahi 86 no Viqueque hamutuk 108.

Kona-ba RAEOA seidauk tanba situasaun COVID-19 afeta ekipa Programa Nasionál Dezenvolvimentu Suku (PNDS) to’o iha Oé-cusse atu halo levantamentu dadus benefisiáriu.

“Ita seidauk foti dadus iha RAEOA tanba ekipa PNDS seidauk bá, maibé sira sei bá iha fulan ne’e atu foti dadus benefisiáriu sira,” nia akresenta.

VIII Governu hakarak finaliza ona lansamentu Uma Kbiit Laek iha fulan ne’e, atubele halo konstrusuan iha territóriu nasionál.

“Ita-nia planu iha fulan ne’e nia laran Uma Kbiit Laek hahú konstrui, nune’e iha fulan-setembru ita finaliza ona uma hirak ne’e iha suku hotu iha territóriu laran tomak,” nia afirma.

Governu hakarak kombate pobreza liuhosi harii kondisaun uma dignu ba povu, tanba uma nu’udar nesesidade prioridade liu hodi garantia ema-nia moris sosiál no ekonómika.

Tanba ne’e, tinan 2021 nu’udar tinan dahuluk deside aloka orsamentu 57% ba munisípiu sira hodi realiza programa ne’e.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here