Komandante Jerál PNTL, Komísariu Faustino da Costa. Imajen/Egas Cristovao

DILI, 17 juñu 2021 (TATOLI)–Komandante Jerál Polísia Nasionál Timor-Leste (PNTL), Komisáriu Faustino da Costa, relata ba Xefe Estadu Francisco Guterres Lú Olo kona-ba mekanizmu halo kontrolu oinsá atu asegura serka sanitária ba munisípiu sira-ne’ebé sei kumpre serka sanitária hanesan Baucau, Bobonaro, Covalima no Dili. 

“Ami aprezenta situasaun no mekanizmu kontrolu oinsá atu asegura serka sanitária ba Xefe Estadu. Xefe Estadu hato’o ba ami katak haree no akompañia nafatin prosesu hirak ne’e to’o hotu,” Faustino da Costa hateten ba jornalista sira hafaoin hala’o enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.

Aleinde ne’e, Komandante Jerál PNTL ne’e hato’o ba PR kazu ema deskuñesidu baku joven mane ida ho naran Costodiuo António de Fatima Pascoal (21) iha aldeia Samelaun, suku Ritabou, postu administrativu Malaiana-Vila, Munisípiu Bobonaro, ne’ebé liga ho arte marsiál ne’ebé oras ne’e daudaun iha hela prosesu nia-laran.

Notísia Relevante: Kazu Ritabou, PNTL Bobonaro kontinua halibur evidénsia

Kazu ne’ebé Komandu iha kompeténsia klaru, Komandu deside halo transferénsia asesoria ida maibé kazu boot ne’ebé públiku hatene ne’e entaun tama ona ba demisaun.

Demisaun ne’e mak envolve komandante munisípiu sira hanesan membru konsellu ne’e para rona opiniaun, haree no deside katak atu demite ka lae tanba konsellu laiha kompeténsi atu demite.

“Ideia hotu-hotu, Prezidente Konsellu sei aprezenta ba Governu no foti desizaun tuir prosedimentu ne’ebé iha,” nia hateten.

Tuir nia, dala barak kazu ne’ebé to’o iha demisaun mak envolve Konsellu maibé atu halo suspensaun de’it Komandu Jerál nia kompeténsia nian mak suspende ema to’o fulan sia (9) loron 240, se kazu grave liu mak sei propoin ba demisaun.

Entretantu, Komisáriu PNTL ne’e informa katak to’o oras ne’e membru PNTL ne’ebé simu ona vasina ka envolve iha vasina hamutuk 2.680-resin.

Jornalista: Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here