Ambiente Klínika Bairru- Pité. Imajen/Facebook

DILI, 17 juñu 2021 (TATOLI)-Klínika Bairru-Pité ezekuta ona 40% apoiu fundu hosi Gabinete Apoiu Sosiedade Sivíl (GASC, sigla portugés).

Notísia Relevante : 2021, Governu aloka rihun $240 ba klínika Bairru-Pité

Iha tinan fiskál 2020-2021,  GASC apoiu fundu ba Klínika Bairru-Pité ho montante  $243.660,00. Nune’e, sira ezekuta ona $97.464.00 (40%) ba atende nesesidade klnika ne’ebé matebian Dr. Daniel Murphy husik hela.

Atu akompaña progresu ezekusaun apoiu fundu hosi GASC ne’e, koordenadór GASC Filipe da Costa ho ekipa, kuarta ne’e, hala’o vizita ba Klínika Bairru-Pité, Dili, hodi haree funsionamentu klínika  no atendimentu-sira hotu.

“Iha pasadu, klínika ne’e enfrenta hela krize finanseira no atu garante funsionamentu klínika nian, maka iha 2019, klínika Bairru-Pité hahú hetan fundu hosi GASC, no ba tinan fiskál 2020-2021 ita fó tan orsamentu hamutuk  $243.660. Ha’u-nia vizita ida-ne’e atu haree oinsá sira-nia rezultadu ezekusaun, ne’ebé ita haree katak sira ezekuta ona $97.464,00 ka 40%,” Filipe da Costa hateten liuhosi komunikadu imprensa ne’ebé Agência Tatoli, asesu kinta ne’e.

Filipe da Costa hateten, hosi ezekusaun 40% ne’e hatudu katak sira halo tratamentu ba pasiente sira ho di’ak no dignu tebes, nune’e GASC hein tan relatóriu ezekusaun nian hosi Jerente Klínika Bairru-Pité molok halo transferénsia daruak ba 60% ho montante $146.190,00.

“Serbisu ne’e importante ne’ebé GASC hein mak Klínika sei halo tirajen Tuberkulozu ba komunidade iha Suku Bairru-Pité hodi ita hatene problema tuberkulozu hira mak identifika ona no ami hein rezultadu ida-ne’e. Ha’u mós enkoraja autoridade lokál no komunidade hodi apoiu ba programa Governu ne’e atu ita-nia suku sai saudavel,” Filipe da Costa hateten.

GASC nia observasaun Klínika Bairru-Pité katak ba fasilidade iha Klínika refere presiza reabilita ba fatin balun tanba fasilidade balun la favoravel hodi atende ba pasiente sira, tanba ne’e Filipe da Costa, espera katak jestór klínika sira bele jere ho di’ak subvensaun ne’ebé hetan hosi GASC hodi responde no reabilita graduál ba fatin ne’ebé urjente, nune’e bele dignifika pasiente sira iha futuru.

Diretór ezekutiva Klínika Bairru-Pité, Inácio dos Santos hato’o agradese ba GASC ne’ebé apoiu finanseira Klínika refere hodi kontinua funsionamentu. Tanba klínika refere hetan krize finanseiru iha inísiu 2019 durante fulan tolu, maibé iha tinan ne’ebé hanesan sira hetan fundu hosi GASC.

“Ami hetan fundu hosi GASC ba tinan 2020-2021 ho montante $243.660.00 hodi hala’o programa hanesan serbisu ba eliminasaun Tuberkulozu no HIV/SIDA ho montante $20.400,00, Kankru Ran $2.160,00, Servisu Maternidade $35.040,00, prevensaun má nutrisaun $6.720,00, funsionamentu klínika $70.080.00, reforsa institusionál $109.260.00, no hosi totál osan iha leten, ami ezekuta ona orsamentu $97.464.00 ka 40%,” Inácio da Costa hateten.

Nia afirma, hosi orsamentu ne’e sira hala’o ona programa klínika nian hanesan atendimentu ba pasiente hahú hosi ema na’in-50 ba leten kada loron, partu inan isin-rua, atendimentu emerjénsia, izolamentu ba ema moras Tuberkulozu, no tratamentu ba malária no HIV/SIDA.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here