TDD. Imajen Tatoli /Dok

DILI, 17 juñu 2021 (TATOLI)—Tribunál Distritál Dili (TDD), liu hosi audiénsia julgamentu, kontinua rona funsionáriu hosi Parlamentu Nasionál (PN), nu’udár sasin ba kazu ne’ebé envolve arguida deputada Maria Anabela Sávio.

TDD notifika arguida ho nia motorista tanba deskonfia pratika krime pekulatu ka ense señas kombustível ho kupón Estadu ba karreta privadu.

Notísia relevante:TDD julga “deputada” Anabela Sávio

Sasin ho inisiál JJB, nu’udár funsionáriu PN fó sasin ba Tribunál katak, iha 09 abríl 2019 iha tuku 17:40 otl, simu kontaktu hosi arguida Maria Anabela kona-bá enxe mina ba karreta privada iha pertamina Lafaek Comoro, ne’ebe Komisaun Anti Korrupsaun (CAC sígla portugés) halo apreensaun.

“Ha’u konsege ba to’o iha pertamina hodi halo justifikasaun ba CAC. Ha’u hatene de’it kupón mina enxe ba karreta PN nian ne’ebé atribui ba deputada, maibé enxe fali ba karreta privada,” JJB haktuir iha sala audiénsia TDD, kinta ne’e.

Sasin rasik iha koñesimentu antes katak, distribuisaun señas atu enxe mina ba karreta MP ho matríkula 8837 PN ne’ebé atribui ba arguida, no la’ós enxe ba karreta privada hodi halo fiskalizasaun ba munisípiu.

Nia konta-tuir, hafoin CAC halo apreensaun ba karreta privada, arguida komunika kedan ba JJB, hodi halo pedidu  manutensaun ba karreta ho matríkula MP 8837, tanba kondisaun la di’ak, nune’e karreta privada substitui hodi halo fiskalizasaun ba munisípiu.

Iha 10 abríl 2019, arguida halo pedidu ba komisaun hodi hato’o ba Prezidente Parlamentu Nasionál (PPN), maibé momentu ne’ebá PPN laiha fatin, nune’e Vise Prezidente komisaun E mak asina, hodi hetan autorizasaun formál, utiliza señas ba karreta privada nune’e ba halo fiskalizasaun.

Momentu ne’ebá JJB  ba iha CAC, hodi husu dokumentu karreta ne’ebé hetan aprensaun ne’ebé konsege fo fila hodi dezloka ba munisípiu.

“Iha lorokraik konsege ba munisípiu hodi halo fiskalizasaun, maibé to’o iha Vemase bainhira atu han meudia, haree fali karreta privada ne’e la bá, maibé karreta PN ne’ebé atribui ba deputada ne’ebé halo manutensaun hela mak ba fali. Ida-ne’e mak sente hakfodak oitoan,” nia konta-tuir.

Nune’e mós sasin VB, nu’udár funsionáriu PN, hateten distribuisaun señas kombustível, antes ne’e distribui ona atu enxe ba karreta PN ho matríkula MP 8837, hafoin hetan ona apreensaun ba karreta privada mak iha autorizasaun hodi uza karreta privada ba halo fiskalizasaun inklui enxe kombustível.

Rona tiha deklarasaun sasin sira, Tribunal deside suspende julgamentu ne’e ba tuku 15:00 otl, hodi rona sasin seluk.

Prosesu julgamentu ne’e prezide hosi juíz singulár José dos Santos Gonçalves, Ministériu Públiku reprezenta hosi prokuradór Ambrosio Rangel no arguida ho arguidu hetan asisténsia legál hosi advogadu privadu na’in-ida.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here