Governadór BCTL, Abraão de Vasconcelos, simbolikamente entrega relatóriu inkluzaun finanseiru tinan 2020 ba entidade relevante, iha salaun Hotel Novo Turismo, kinta (17/06). Imajen TATOLI/Francisco Sony

DILI, 17 juñu 2021 (TATOLI)Banco Sentrál Timor-Leste (BCTL, sigla portugés), iha kinta ne’e, lansa relatóriu inkluzaun finanseira tinan 2020, ho tema ‘Aumeta Asesu Servisu Finanseiru liuhosi Dijitalizasaun.

Relatóriu ne’ebé lansa tinan 2020 ne’e ba datoluk, ne’ebé Banku Sentrál deside kada tinan-rua publika, hahú tinan 2016, 2018 no 2020.

Governadór BCTL, Abraão de Vasconcelos, informa, relatóriu ne’e hatudu katak, ein termu pontu asesu servisu finanseiru ninian, iha munisípiu Ermera no Baucau mínimu tebes, kompara ho munisípiu seluk.

“Ida-ne’e ezersisíu ba Governu, BCTL no instituisaun finanseira atu haree tanba saida pontu asesu númeru oituan, populasaun ne’ebé asesu ba servisu finanseiru mós oituan entaun hanesan traballu ida ba entidade hotu. Ne’e la’ós foin akontese iha relatóriu 2020, maibé iha relatóriu rua uluk mós munisípiu rua ne’e iha,” Governadór BCTL relata iha ámbitu lansamentu relatóriu, iha salaun Hotel Novo Turismo, Lecidere.

Governadór BCTL, Abraão de Vasconcelos. Imajen TATOLI/Francisco Sony

Tuir Dirijente banku ne’e, relatóriu ne’e bazeia ba pontu asesu ema ida iha flesibidade halo levantamentu osan iha mákina ATM, sukursál banku ka bele ba ajente ida.

Nune’e mós, relata diskrisaun kona-ba atu haree kualidade servisu finanseira sira.

“Ida-ne’e parte ida hanesan kompromisu Banku Sentrál atu informa ba públiku, Governu no instituisaun finanseira sira, kona-ba situasaun dezenvolvimentu iha sistema finanseira,” nia tenik.

Relatóriu ne’e, koloka asuntu importante sira kona-ba utilizasaun servisu finanseira ba tinan 2020, hatudu progresu di’ak tanba populasaun adultu ne’ebé asesu ba servisu finanseira atinje ona 68%.

“Signifika kada populasaun adultu na’in-100, iha 86 mak iha konta bankária, ne’e signifikante tanba ajuda ita intende kona-ba situasaun dezenvolvimentu iha ita-nia instituisaun,” nia akresenta.

Aleinde ne’e, BCTL iha hanoin moderniza sistema pagamentu, ne’ebé prosesu ne’e hahú ona iha tinan barak no fasilita konekta entre institusaun finanseira inklui karteira eletrónika ba sistema P24, nu’udar sentru ba operadór nasionál.

Governadór konsidera, halo mudansa ba sistema presiza tebes rekursu no han tempu barak, maibé funsionalidade sistema ajuda kliente institusaun finanseira halo tranzasaun ho maneira dijitál entre diferente kliente hosi institusaun finanseira no fasilita trazasaun entre konta bankária no konta karteira eletrónika.

“Sistema ne’e konveniénsia iha servisu finaseiru, nu’udar ezemplu pagamentu taxa ba Governu bele selu iha ATM no iha futuru timor-oan sira bele uza kartaun débitu iha rejiaun nasaun seluk,” nia hatutan.

Maioria kliente uza konta bankária simu pagamentu hosi Governu

Iha biban hanesan, Vise-Governadora, Nur Aini Alkatiri, hateten, iha aumentu imprensivu 200% ba pontu asesu servisu finanseiru, ne’ebé barak liu kontribui hosi ajente karteira eletrónika nian.

Tuir nia, relatóriu inkluzaun finanseira 2020 ne’e diferente ho relatóriu antes, tanba relatóriu ne’e la’ós aprezenta de’it dadus ne’ebé Banku Sentrál rekolla hosi instituisaun finanseira sira hotu, maibé rekolla mós dadus liuhosi peskiza hamutuk ho The Asia Foundation.

“Relatóriu ne’e hatudu utilizadór konta bankária, barak mak uza konta hodi simu pagamentu hosi Governu de’it no hosi fonte seluk korresponde 6%, ne’ebé maioria kliente uza de’it sira-nia konta bankária atu simu pagamentu hosi Governu. Iha parte foti osan ka levantamentu 38%, ne’ebé sira halo levantamentu dala-ida to’o tolu kada fulan,” nia esplika.

Identifika mós katak populasaun barak mak laiha konta iha banku, tanba sira laiha rendimentu no banku dook.

“La rai osan iha banku tanba rendimentu la sufisiente no prefere gasta de’it tanba sente la seguru rai osan,” nia dehan.

Nune’e mós, Koordenadór Residente Organizasaun Nasaun Unida (ONU), Roy Trivedy, konsidera, inkluzaun finanseira presiza hatene nesesidade kliente.

“Tanba ne’e presiza komprende kliente sira-nia nesisidade, atu nune bele kria produtu ne’ebé adekuadu. Ida-ne’e aliña ho tema nasaun unida katak ‘la husik ema ida mesak iha kotuk’,  tanba ne’e importante kria servisu finanseiru no edukasaun finanseira ne’ebé disponível ba ema hotu,” nia subliña.

Seremónia ne’e partisipa hosi Ministru Koordenadór Asuntu Ekonómiku (MKAE), Joaquim Amaral, Sekretáriu Estadu Kooperativa, Elizário Ferreira, entidade institusaun finanseira no parseiru dezenvolvimentu ne’ebé iha papel ba dezenvolvimentu setór finanseiru.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here