Governadór BCTL, Abraão de Vasconcelos. Imajen TATOLI/Francisco Sony

DILI, 17 juñu 2021 (TATOLI)—Governadór Banku Sentrál Timor-Leste (BCTL, sigla portugés), Abraão de Vasconcelos, informa, bazeia ba dadus ikus ne’ebé simu, ema hamutuk 10.000 mak aplika atu asesu ba programa Moratóriu Kréditu.

“Prosesu aplikasaun anúnsia ona no banku komersiál sira anúnsia idaidak, ba populasaun sira ne’ebé iha kréditu no hakarak asesu bele kontaktu banku no hetan formuláriu hodi prienxe no hatama ba banku. Agora daudaun, bazeia ba dadus ohin dader, individuu hamutuk 10.000 resin mak aplika ona,” Governadór BCTL hateten iha ámbitu lansamentu relatóriu inkluzaun finanseira 2020, iha salaun Hotel Novo Turismo, kinta ne’e.

Programa Moratóriu Kréditu nu’udar programa públika, ne’ebé introdús liuhosi lei númeru 8/2021, loron 03 maiu, ne’ebé sofre alterasaun dahuluk ba Lei númeru 4/2020, loron 29 dezembru, Orsamentu Jerál Estadu (OJE) 2021, ne’ebé aprova medida ba apoiu sosiu-ekonómiku.

Notísia relevante: 01 juñu, BCTL hahú prosesu inskrisaun programa Moratóriu Kréditu

Programa ne’e nu’udár polítika Governu atu apoia rekuperasaun ekonómika iha ámbitu pandemia COVID-19.

“Ha’u fó ezemplu Moratóriu Kréditu, se kada fulan kréditór tenke selu fali kréditu $100 no ninia juru $20, kuandu partisipa iha programa ida-ne’e la selu ona $100 no juru $20, selu de’it 40%, signifika durante fulan-sia kreditór selu de’it $8 kada fulan, ne’e mak vantajen programa ne’e,” Dirijente Banku Sentrál ne’e esplika.

BCTL anúnsia loke inskrisaun ba programa nasionál ne’e iha loron 01 juñu 2021 no sei taka inskrisaun iha loron 25 juñu 2021 no laiha estensaun.

Programa ne’e ho ninia durasaun fulan-sia, konta hosi loron 01 juñu 2021 to’o iha loron 31 marsu 2022.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here