Fuma sigaru bele mós hamosu kankru ran. imajen/google.

DILI, 17 juñu 2021 (TATOLI)—Komandu Jerál, Polisia Nasionál Timor-Leste (PNTL), orienta ona Diresaun Nasionál Tránzitu no Seguransa Rodoviária (DNTSR), atu koordena ho Diresaun Nasionál Transporte no Terrestre (DNTT), hodi reativa operasaun no la tolera motorista ho pasajeirus ne’ebé fuma-sigarru iha karreta laran inklui fatin públiku.

Portavóz Komandu Jerál PNTL, Superintendente Xefe, Arnaldo de Araújo rekoñese implemententasaun regra kontrolu no bandu fuma-sigarru ne’ebé lansa ona iha tinan 2020 serbisu ne’e paradu, tanba PNTL no Ministériu Saúde foka ba kombate COVID-19.

Notísia relevante:Governu hakotu konfinamentu domisiliáriu no autoriza hikas movimentu transporte públiku

“Regra bandu motorista no pasajerus-sira fuma-sigarru iha karreta laran, ita lansa tiha ona. Tanba ne’e, ita sei reativa fila-fali operasaun, hodi aviza nafatin ba motorista-sira atu kumpre regra ne’e. Se mak la kumpre ita sei fó sansaun tuir lei,” Arnaldo de Araújo hateten ba jornalista-sira iha Komandu Jerál PNTL, Caicoli, kinta ne’e.

Nia dehan, parte DNTSR-DNTT sei halo kontrolu ho rigór ba motorista-sira, bainhira detekta kontra regra ne’e maka sei halo apreensaun hodi fó tikete atu selu infrasaun.

Kona-bá ajenda operasaun, PNTL sei koordena ho ekipa Ministériu Saúde no Organizasaun Naun Govermentál (ONG), atu kontinua sosializa regra ba komunidade kona-bá efetu hosi fuma-sigarru iha fatin públiku.

Governu Timor-Leste prodús ona rejime kontrolu tabaku ho númeru 14/2009 ne’ebé la’ós de’it vale ba vendedór-sira, maibé mós ba fumadór.

Rejime ne’e ko’alia mós oinsá fumadór-sira tenke komporta tuir rejime jurídiku-ne’e, bainhira atu fuma karik tenke haree didi’ak fatin, labele fuma iha fatin públiku, liuliu bainhira sa’e transporte públiku.

Governu liuhosi reuniaun Konsellu Ministru (KM) iha kuarta (16/06) deside hakotu konfinamentu domisiliáriu jerál iha munisípiu Dili, maibé renova hikas Serka Sanitária, nune’e bele fó fleksibilidade ba movimentu transporte públiku.

Jornalista: Eugénio Pereira  

Editór: Cipriano Colo

HAKEREK NO HATÁN

Please enter your comment!
Please enter your name here