Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 17 juñu 2021 (TATOLI)Diretór Ezekutivu  Servisu Rejistu Verifikasaun Emprezariál (SERVE), Florêncio Sanches, planeia hadi’a servisu atendimentu rejistrasaun uza sistema online.

Dirijente ne’e hato’o lia hirak ne’e, hafoin Governu liuhosi reuniaun Konsellu Ministru iha kuarta (16/06) kontinua nia mandatu ba tinan-tolu tan.

Notísia relevante: Florêncio Sanches kontinua asume kargu Diretór Ezekutivu SERVE, I.P ba tinan-tolu

“Agora ha’u-nia planu ba mandatu tinan-tolu iha buat rua importante, dahuluk tenke hasa’e kapasidade funsionáriu atubele atende di’ak liután emprezáriu no hadi’a di’ak liután servisu atendimentu iha SERVE, tanba ne’e ha’u-nia planu atu sosa sistema eletróniku atu halo rejistu online,” Diretór Ezekutivu SERVE hateten iha nia knaar fatin, Palm Bussiness, Fatuhada, kinta ne’e.

Nia nota katak iha nasaun balun, bainhira ema ba rejistu atividade komersiál, la ba hasoru malu ho funsionáriu servisu rejistrasaun maibé uza sistema online.

“Planu ida-ne’e SERVE sei implementa iha tinan-rua oin mai, entaun tinan-ida ne’e sei hato’o planu no programa ne’e ba Konsellu Ministru atubele tau osan, nune’e tinan oin ita bele halo akizasaun ba sistema online ne’e  rasik,” nia akresenta.

Ba kestaun ne’e, SERVE sei halo kooperasaun ho parseiru internasionál hanesan banku atu apoia rekursu umanu fó asesoria relasiona sistema atendimentu online ba servsiu rejistu komersiál.

“Ha’u fiar kuandu ita implementa sistema atendimentu ba rejistu komersiál via online, númeru rejistu emprezariál sei sa’e,” nia hatutan.

Daudaun SERVE uza de’it atendimentu baibain, ne’ebé númeru empreza ne’ebé halo ona rejistu komersiál hamutuk 30.000.

“Ha’u-nia mandatu, hakarak númeru empreza sa’e no ha’u fiar liuhosi sistema online ne’e ita bele hasa’e tan númeru ne’e. Agora ita iha empreza 30.000 rejistradu, entaun kada tinan maizumenus iha millaun $200, tanba ne’e ita hakarak aumenta tan 30.000 rejistu komersiál, entaun ita iha millaun $400 kada tinan,” nia subliña.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here