Membro Deputado PUDD, António de Sá Benevides. Imajen/Egas Cristovão.

DILI, 17 juñu 2021 (TATOLI)—Deputadu hosi Bankada Partidu Unidade Dezenvolvimentu Demokrátiku, António de Sá Benevides, hala’o tratamentu saúde iha ospitál Jakarta Indonézia tanba moras.

Prezidente PUDD Interinu, Silvestre Xavier Sufa ho esturura partidu nian hasoru malu ho Prezidente Parlamentu Nasionál, hodi ko’alia kona-ba kondisaun saúde Deputadu Benevides nian tanba kadeira bankada nian mamuk hela entaun fó impaktu ba aprovasaun ba asuntu importante sira.

“Ohin, estrutura hosi PUDD halo konfirmasaun ho Prezidente Parlamentu Nasionál kona-ba deputadu António de Sá Benevides tanba agora daudaun nia moras no halo hela tratamentu iha Jakarta. Ita hatene katak ami kadeira ida de’it entaun deputadu ne’e moras entaun laiha reprezentante iha parlamentu,” Prezidente PUDD Interinu, Silvestre Xavier Sufa informa ba jornalista sira, hafoin hasoru malu ho Prezidente Parlamentu Nasionál, iha uma fukun kinta ne’e.

Nia fó-sai katak, deputadu nia kondisaun saúde seidauk di’ak no oras ne’e iha hela prosesu rekuperasaun iha Jakarta.

“Agora nia kondisaun saúde seidauk di’ak no oras ne’e iha hela prosesu rekuperasaun saúde iha Jakarta. Nia moras dezde 2015 to’o agora sei moras nafatin. Kona-ba substituisaun temporária sei hein tanba ami sei halo konfirmasaun ba deputadu Benevides. Aban ka loron tuir mai, ami sei fó rezultadu ba parlamentu. Maibé, segunda hanesan ne’e ami bele fó ona rezultadu,” nia dehan.

Prezidente PUDD Interinu ne’e seidauk bele fó-sai katak tipu moras ne’ebé Deputadu Benevides enfrenta tanba sei halo hela tratamentu saúde.

Entretantu Vise-Prezidente Parlamentu Nasionál, Deputada Maria Angelina Lopes Sarmento, fó-sai katak deputadu Benevides dezloka ba Jakarta iha semana hirak liu-ba liuhosi terrestre.

“Iha pasiente barak hosi ita-nia rain ne’ebé presiza dezloka ba halo tratamentu saúde, nune’e mak deputadu António de Sá Benevides faz parte hotu ekipa ne’ebé mak dezloka ba tratamentu saúde iha rai-li’ur ne’ebé Ministériu Saúde mak rekomenda,” nia haktuir.

Parlamentu seidauk hatene substituisaun temporáriu, tanba tuir rejimentu parlamentu nasionál rekerimentu ba substituisaun temporaria ne’e inisiativa hosi bankada bazea ba lista kandidatura eleisaun parlamentár nian, ne’ebé aprovadu hosi Komisaun Nasionál Eleisaun (CNE-sigla portugés).

“Ami meza seidauk hatene. Tanba, substitusaun depende bele iha loron ida. Kuandu bankada haree katak nesesidade atu nia fó nia votu ba lei ruma ka Orsamentu Jerál Estadu/ Kuandu nia laiha, obrigatóriu tenke iha ema ida substitui atu iha votu. Bele halo substituisaun temporariu maibé depende ba bankada PUDD,” nia dehan.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here