Prezidenti Autoridade Munisípiu Baucau (PAM), Olívio 'Bou Lesa' Freitas. Imajen TATOLI/Natalino Belo

BAUCAU, 17 juñu 2021 (TATOLI)–Prezidente Autoridade Munisípiu Baucau (PAM), Olívio ‘Bou Lesa’ Freitas, husu Baucau-oan sira tenke iha konsiénsia kumpre regra prevensaun atu hakotu korrente COVID-19 iha rejiaun ne’e.

“Kestaun konsiénsia sidadaun idaidak bele la’o tuir ka lae, ida-ne’e mak ikus ona no ita hotu sai autór halo sensibilizasaun regra sira hodi povu Baucau tuir, atu nune’e bele trava transmisaun COVID-19 iha ita-nia rai, maibé se lakohi tuir, ita mak konsiénte atu halo barak liután COVID-19 iha ita-nia rai,” PAM Baucau hateten, iha Sentru Konvensaun Baucau (CCB, sigla Portugés), kinta ne’e.

Tuir nia, métodu atu hamenus transmisaun vírus, maka bainhira halo movimentu tenke uza máskara, fase liman beibeik, halo distánsia no labele halo seremónia ne’ebé halibur ema barak liu.

Nune’e mós, bainhira iha bazar (merkadu) maka la kumpre regra prevensaun COVID-19, nafatin transmite hosi ema ba ema.

Aleinde ne’e, iha Baucau hahú realiza ona vasina tipu AstraZeneca faze daruak, hodi aumenta imunidade ema idaidak kontra atake COVID-19.

Notísia relevante: Lansa vasina doze daruak, PAM Baucau enkoraja hatutan informasaun

Nune’e, Autoridade munisipál husu komunidade hotu partisipa kampaña vasina, maski la’ós obrigatóriu maibé di’ak liu voluntáriu tuir tamba iha efeitu di’ak tebes no livre ba ema atu halo movimentu ba territóriu tomak ho kartaun kinur (kartaun vasina).

“Sidadaun hotu, hahú hosi autoridade munisípiu, xefe suku, aldeia inklui admistradór postu hotu tenki iha responsablidade tuir regra atu trava transmisaun COVID-19 iha Baucau.

Tuir dadus nasionál, númeru COVID-19 iha munisípiu Baucau, ho kazu rejistadu hamutuk 382, ativu hamutuk 129, no rekupera 253.

Aleinde ne’e, Governu liuhosi reuniaun Konsellu Ministru, deside renova serka sanitária iha Baucau, durante loron hitu, hahú hosi loron 16 to’o 23 juñu 2021.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here