Xefe suku Kaibada, postu admistrativu Baucau villa, munisípiu Baucau,José Filomeno Agapito Soares Iong. Imajen TATOLI/Natalino Belo

BAUCAU, 17 juñu 2021 (TATOLI)—Xefe suku Kaibada, postu admistrativu Baucau villa, munisípiu Baucau, José Filomeno Agapito Soares Iong, hateten, aldeia Maulame to’o agora seidauk asesu infraestrutura bázika.

“Desde ita-nia Restaurasaun Independénsia to’o agora, aldeia ne’e sai vítima tanba seidauk asesu eletrisidade, estrada no bee-mos no kondisaun mak la premite ita-nia komunidade hela permanente iha ne’ebá, bainhira kondisaun di’ak sira bele hela permanente hodi dezenvolve sira-nia área,” Autoridade lokál ne’e dehan iha Administrasaun Munisipál Baucau, Villa nova, kinta ne’e.

Antes ne’e, iha tinan 2018, Xefe suku inklui komunidade Maulame ho inisitiva rasik hato’o pedidu ba Eletricidade de Timor-Leste, Empreza Públika (EDTL, E.P) Baucau hodi foti rin eletrisidade hamutuk 32 hodi harii ona tuir fatin no daudaun ne’e hein kompleta tan liña fiu.

Notísia relevante: Hahú ohin, EDTL,E.P lansa konkursu instala eletrisidade pakote 30

Daudaun ne’e, autoridade lokál kontinua tenta halo karta proposta ba EDTL, E.P inklui tékniku nasionál sira no kinta ohin (17/06) hasoru tan EDTL Baucau atubele fó despaixu hodi fornese tan ekipamentu seluk, hodi kompleta liña eletrisidade iha aldeia Maulabe.

Kona-ba bee-mos, liuhosi fundu Programa Nasionál Dezenvolvimentu Suku (PNDS), autoridade suku sei presiza halo revizaun relasiona ho programa prioridade iha aldeia Maulame kona-ba bee-mos.

Notísia relevante: PNDS kontinua implementa programa regulár iha Baucau

Maski iha tinan 2017-2018 halo ona perfurasaun bee atu kanaliza ba komunidade Maulame, maibé seidauk atinje 100% tamba tuir kompañia, liña distribuisaun bee  presiza eletrisidade.

“Perfurasaun la’o ona, maibé presiza mós eletrisidade ne’ebé bele monta bomba hodi bee sai,” nia akresenta.

Aldeia Maulame iha suku Kaibada ho totál populasaun hamutuk 145 hosi uma-kain 38.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here