Diretór Autoridade Aduaneira Rejiaun Adminstrativa Espesiál Oé-Cusse Ambeno (RAEOA), José da Costa. Imajen Tatoli/Abilio Elo Nini.

OÉ-CUSSE, 16 Juñu 2021 (TATOLI)—Diretór Autoridade Aduaneira Rejiaun Adminstrativa Espesiál Oé-Cusse Ambeno (RAEOA), José da Costa, hateten hahú hosi fulan-janeiru to’o juñu ne’e reseita hosi servisu Autoridade Aduaneira RAEOA menus kuaze 80% tanba impaktu hosi estadu emerjensia no serka sanitaria.

“Reseita ne’ebé Autoridade Aduaneiro rekolla hahú hosi janeiru to’o ohin loron lahanesan ho reseita iha 2019 ba kotuk ne’ebé kada tinan ida rekolla millaun $1 ba leten. Maibé, agora fila-fali ba kondisaun 2014-2013 nian, sorte ne’e kada fulan rekolla reseita rihun $20 no dala ruma rihun $12 de’’it. Ne’ebé, taxa agora menus (monu) kuaze 80%,” Diretór Autoridade Aduaneira RAEOA, José da Costa, informa ba Agência TATOLI, iha nia knaar fatin, kuarte ne’e.

Nu’udár funsionáriu Estadu nian sente triste tanba taxa menus, signifika Autoridade Aduaneira ninia rezultadu servisu ladún másimu.

Razaun, nia dehan, la’ós tanba funsionáriu sira mak la kontrola maibé politika rai laran no propagasaun COVID-19 iha Timor-Leste ne’ebé afeta tebes ba servisu sira-ne’ebé Autoridade Aduaneira RAEOA hala’o durante ne’e.

“Uluk Oé-Cusse taka totál ne’e, Autoridade Aduaneira nia servisu mak tuur de’it. Sorte, foin fulan rua (2) Guvernu autoriza loke fila-fali ne’e mak iha fulan hira nia laran ne’e, ita hetan reseita uitoan. Reseita ninia montante ha’u labele halo predisaun tanba servisu sei la’o hela to’o fulan-dezembru ne’’e ita hetan reseita hira. Maibé, atividade durante ne’e la’o di’ak hela hodi serví komunidade,” nia hateten.

Reseita ne’ebé Autoridade Aduaneira RAEOA rekolla hodi kontribui ba kofre Estadu ne’e liuhosi fronteira terrestre haat (4) mak fronteira Sakato iha suku Nipani, postu administrativu Pante Makasar, fronteira Oésilo iha suku Bobometo, postu administrativu Oésilo, fronteira Pasabé iha suku Abani, postu administrativu Pasabé no Fronteira Citrana iha suku Bene-Ufe, postu administrativu Nitibe

“Ita-nia ema koloka hotu iha fronteira sira-ne’e. Loro-loron sira hamutuk ho parseriu sira hanesan PNTL Unidade Patrollamentu Fronteira (UPF) atu kontrola fronteira ba sasán sira-ne’ebé tama illegal. Uluk, kada loron sábadu taxa sempre tama maibé agora taka totál tanba Guvernu autoriza de’it tama hosi fronteira Sakato, tanba hetan akompañamentu hosi ekipa saúde ba prevensaun COVID-19 nian,” nia dehan.

Dadaun ne’e Governu autoriza sasán importasaun ne’ebé tama RAEOA ne’e prioritiza liu ba nesesidade bázika nomós materiál konstrusaun nian ne’e bainhira Guvernu persiza mak foin importa urjente.

“Atividade importasaun ne’e hala’o kada semana tama dala ida, akontese iha loron kuarta de’it,” nia haktuir.

Jornalista: Abilio Elo Nini

Editór: Cancio Ximenes

HAKEREK NO HATÁN

Please enter your comment!
Please enter your name here