Livru Tais Tradisional hosi Baucau. Imajen/Espesiál.

DILI, 16 juñu 2021 (TATOLI)—Diretór Nasionál Promosaun Arte no Kultura, Felix Ximenes, hateten Sekretáriu Estadu Arte no Kultura (SEAK) liuhosi Dirasaun Nasionál Promosaun Arte no Kultura prodús ona livru hamutuk hitu ho titulu “Tais Tradisionál” no “Dansa no Múzika Tradisionál” kona-ba tais, dansa no múzika tradisionál iha Timor-Leste.

Notísia Relevante: 2021, UNESCO Rekoñese Tais Timor Nu’udar Patrimóniu TL

Diretór Nasionál Promosaun Arte no Kultura, Felix Ximenes. Imajen Tatoli/Nelia Fernandes.

“Ami prodús ona livru kona-ba tais tadisionál hamutuk haat (4), hosi munisípiu Baucau, Bobonaro, Lautém no Covalima. Enkuantu, kona-ba dansa no múzika tradisionál, ami prodús ona livru tolu kona-ba dansa no múzika tradisionál hosi Munisípiu Manatuto, Manufahi no Rejiaun Adminsitrativa Eespesiál Oé-Cusse Ambeno (RAEOA),” Felix Ximenes hateten ba Agência Tatoli, via telefónika, kuarta ne’e.

Produsaun livru kona-ba tais nian ne’e bazea ba rezulatdu peskiza no servisu hamutuk ho Organizasaun Naun Governamentál Timor AID, ne’ebé hala’o iha munisípiu ualu (8) maibé munisípiu haat mak prodús ona ba livru no munisípiu haat seluk sei iha prosessu elaborasaun ba hakerek ni’an.

Entretantu, produsaun livru kona-ba dansa no múzika ne’e, Sekretária Estadu Arte no Kultura (SEAK) serbisu hamutuk ho Sanggar Santo António, hodi halo produsaun ba livru tolu refere.

Livru sira-ne’ebé prodús kona-ba tais ho titulu “Tais Orijinál” ne’ebé prodús bazea ba peskiza kona-ba tais hosi munisípiu Covalima iha tinan 2012, Lautém iha 2013, Baucau iha 2014 no Bobonaro iha 2015.  

Nune’e mós produsaun ba livru kona-ba dansa no múzika ho titulu “Dansa no Múzika Tradisionál” ne’e, foti hosi dansa no múzika tradisionál hosi munisípiu Manatuto iha tinan 2015, Manufahi iha 2013 no Rejiaun Administrativa Espesiál Oé-Cusse Ambeno (RAEOA) iha tinan 2014.

Notísia Relevante: Governu Apoiu Rejistu Múzika “Tebe-Tebe” Iha UNESCO Sai Genre Foun

Jornalista: Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here